Градоначалничката на Град Скопје, Данела Арсовска во предизборната програма вети дека истата ќе биде надополнета и дека има конкретни проекти кои се брзи и сигурни решенија за старите проблеми на Шуто Оризари. Исто така вети дека ќе се посвети на проширување на „македонско-косовска бригада“ од Чаир до Шуто Оризари, дека ќе обезбеди побрзо и побезбедно патување, што всушност е и најболната точка во нашата општина. Вети и продолжување и проширување од Булевар „Словенија“, како и ветувањето дека токму од Шуто Оризари повторно ќе покажеме дека Скопје се грижи за своите граѓани. Ветуваше и базен во Шуто Оризари. Значи, за жал, помина повеќе од една година, а во општината имаме нула инвестиции од Град Скопје, потенцира Курто Дудуш, градоначалникот на Шуто Оризари, на панелот на ЦИВИЛ: „Шуто Оризари, заборавена општина“.
„За една година ние имавме само еден состанок. На тој прв состанок според кажувањата на градоначалничката таа ни навести дека ќе се води политики за Шуто Оризари што ги има во нејзината програма, а ние да водиме паралено, односно ако она пушти некоја улица во употреба, ако сака градоначалникот на општината може да дојде, но и немора“, потенцира Дудуш.
-На разни политички дебати пред избори имаме ветувања од градоначалници, советници дека прашањата ќе се решат, како на локално, така и на национално ниво. Ние ги следиме тие предизборни ветувања и ги држиме отчетни општините за време на добиениот мандат. До сега имаме поднесено буџетски барања во 20 општини. Тоа го правиме низ партиципивен процес заедно со граѓаните, вели Алберт Мемети од Ромалитико / АВАЈА, кој додава дека една практика која што треба да се смени во сите општини е дека граѓаните треба да имаат учество во креирањето на буџетите во општините.
-Секој граѓанин плаќа различни даноци на општините и затоа општините треба да реинвестираат во самото население, смета Мемети.
ИЗЈАВА НА ДЕНОТ
Секоја иницијатива што би можела да биде назадување и со тоа да го попречи патот на земјата во ЕУ-интеграциите, навистина би требало да се избегнува, вели евроамбасадорот Дејвид Гир за иницијативата на ВМРО-ДПМНЕ за референдум против договорот со Бугарија.
-Се сеќавам дека кога за прашањето за уставни измени се разговараше првпат, а тоа беше минатата година, тогаш немаше противење низ политичкиот спектар, беше доста тивко за ова конкретно прашање, вели Гир во интервју за 360 степени.
ФЛЕШ ВЕСТИ
ПОЛИТИКА Бојан Христовски, досегашниот директор на ЈП „Градски паркинг“-Скопје, како и неговиот колега од ЈП „Дрисла“ – Скопје, Јане Мицевски, преку фејсбук денеска соопштија дека даваат оставка од функцијата директор.
По вчерашните оставки и разрешувања денеска уште двајца кадри на ВМРО-ДПМНЕ ја напуштија функцијата директор во градските претпријатија.
ИНЦИДЕНТ Од Министерството за внатрешни работи за МИА потврдија дека денеска физички бил нападнат градоначалникот на Општина Арачиново, Ридван Ибраими.
СОРАБОТКА Снабдување со лигнит и јаглен од рудниците во Грција во следниот период, снабдување со мазут, но и можност за грчка инвестиција со изградба на гасна централа до 200 мегавати, најави премиерот на Северна Македонија Димитар Ковачевски од Атина, веднаш по средбата со неговиот грчки колега Кирјакос Мицотакис.
ЗЕЛЕНИ ПОЛИТИКИ Битиќи од конференцијата за Зелениот климатски фонд во Јужна Кореја: Од зависност, кон меѓузависност, соработката и солидарноста е нашиот пат напред и успех во справување со климатските промени
ВОЈНА ВО УКРАИНА
Група руски функционери апелираа до Државната дума на земјата да го отстрани претседателот Владимир Путин од власт под обвинение за велепредавство, открива документот што го сподели еден од руските пратеници кои го потпишаа предлогот, пренесува Њузвик.
*
По значајниот воен неуспех, новите извештаи сугерираат дека Русија ги прекинала плановите за испраќање дополнителни војници и единици во Украина, пишува Њузвик.
*
Секретарот на украинскиот Совет за национална безбедност и одбрана, Олексиј Данилов, одговори на заканите на блискиот соработник на рускиот претседател Путин, Дмитриј Медведев, порачувајќи му да си најде бункер во кој ќе се сокрие.
*
Во регионот Харков, руските трупи отворија оган врз градот Харков и локалните области во текот на изминатиот ден, вклучувајќи ги и неодамна деокупираните области. Како резултат, загинаа тројца цивили, објави началникот на регионалната воена управа на Харков, Олех Синиехубов на Телеграм, јавува дописникот на Укринформ.
*
Украина вчера соопшти дека повратила повеќе терен во војната со Русија и ги удвои своите повици Москва да се предаде на југот. Следните чекори на Украина би можеле да го одредат краткорочниот тек на војната. Лажниот потег може да ги потроши достапните можности, но предолгото чекање може да дозволи првите линии да се замрзнат со почетокот на зимата, пренесува Њу Јорк Тајмс.
ИНТЕРВЈУ
За животот во Египет, предизвиците, прилагодувањето со тамошната култура и начинот на живот, како и за општествените прилики, човековите права, мултикултурализмот и почитувањето на разликите во Египет, ексклузивно за ЦИВИЛ Медиа раскажа Офелија Гаџевска Садек.
СЛОБОДНА ЗОНА
Корективните критериуми (согласно меѓународните стандарди) се формулираат како давање предност на кандидатот од помалку застапената етничка заедница во услови на кандидати кои приближно исто ги исполнуваат условите и со засилување на образованието на кадри од конкретна етничка заедница кои недостасуваат во јавниот сектор.
Во ниту еден меѓународен документ не се спомнува етничката припадност како основен критериум при вработувањето во јавниот сектор и во државната администрација. Секаде како основни критериуми се спомнуваат: знаењето, искуството и соодветниот интелектуален и професионален капацитет, а етничката припадност фигурира како коректив на евентуална идентификувана дискриминација.
Наспроти ова во Македонија упорно се турка на преден план партиската припадност спакувана во етничка обвивка и залепена со меѓупартиски пазар, пишува Мирјана Најчевска во колумната „Критериуми и корективи“.
„Дека општеството е пополаризирано од кога и да е сведочи атмосферата на напнатост в очи организацијата на Европскиот прајд чиј домаќин, за првпат, ќе биде градот Белград. Одлуката дека Европскиот прајд ќе биде одржан во Белград е донесена уште во 2019 година, но ниту одблизу не предизвика реакција од јавноста, особено од хомофобичниот и хомоскептичниот дел, како пред самото одржување. Зошто, и покрај растот на афирмацијата на ЛГБТКА+ заедницата во изминатите неколку години (иако побавно во однос на другите, особено западните општества), одеднаш таков пораст на хомофобија и хомоскептицизам?“, пишува Зорана Миловановиќ во колумната „Време на конфузија на идеологии“.
Д. Муратов
