Политичкиот аналитичар Петар Арсовски смета дека е потребен натпартиски консензус дека ќе се престане со партизација и политизација на судските случаи. Во гостувањето во „Само вистина“, коментирајќи ја состојбата со корупцијата, тој додаде дека е проблем што корупцијата метастазира надолу во системот.
-И во западните демократии постои корупција, но таму има предвидлив систем, рече Арсовски.
Според него трпението на јавноста за одредени судски случаи е потрошено и трендот на неказнивост мора да запре.
-Имаше бурна јавна реакција на укинувањето на пресудата за „Таргет-Тврдина“. За прилушувањето имаше признание од лицата од МВР, а голем број новинари и јавни личности имаа список со свои разговори кога биле прислушувани. Апелација го чуваше девет месеци предметот во фиока, иако треба да одговори во рок од 60 дена, што е навистина загрижувачко рече Арсовски.
Арсовски смета дека Бугарија треба да направи повеќе чекори за враќање на довербата, нашите односи се влошуваат во континуитетВо гостувањето во „Само вистина“ тој кажа дека на ова поле има голем простор за работа.
-Македонија изгледа како возрасниот во таа дебата, а Бугарија како да има поадолесцентен однос. Сепак, проблемите во односите не се содржат во предлогот за уставни имени. Таа дебата за уставните измени ќе дојде, но тие се само капка во целиот пакет, тоа е најбенигната капка. Ако мислиме дека уставните измени се најголем проблем во преговорите со ЕУ, многу сме згрешиле. Кога ќе кажете дека сте против уставните измени, тогаш тоа значи дека сте против преговарачката рамка на ЕУ и тогаш сте за прекинување на преговорите. Во таков случај ќе треба да се откажаме, да чекаме како што некои велат, Бугарија да се свести, па да има некои нови генерации и поколенија за почеток на преговорите за членство со Унијата, рече Арсовски.
Тој додаде дека процесот на преговори овозможува било која од 27-те земји членки да блокира било кое поглавје за време на преговорите.
-Се соочуваме со геополитичка ситуација кога има војна во Украина и кога се зазема страна. Со ваква геополитичка ситуација ние сме донесени пред избор со кој или ги прифаќате уставните измени или не и тука завршуваат преговорите за членство… Никој, ниту една партија не кажува во тој избор што ќе одлучи. Изборот во моментов е таков и чесно е партиите да кажат во ваков избор што тие би избрале, кажа Арсовски.
