Светска банка денеска ги намали прогнозите за раст за 2023 година, на нивоа кои се на работ на рецесија за многу земји, бидејќи влијанието на зголемувањето на каматните стапки на централната банка се интензивира, војната на Русија во Украина не е ни блиску до крајот, а најголемите светски економии стагнираат.
Светска банка очекува раст на глобалниот БДП од 1,7 отсто во 2023 година, што е најнизок процент од 1993 година, доколку се исклучат рецесиите од 2009 година и пандемиската 2020 година.
Во својот претходен извештај за глобалните економски перспективи во јуни 2022 година, банката прогнозираше глобален раст од три проценти за оваа година.
Светска банка предвидува раст од 2,7 отсто за 2024 година, а за периодот од 2020 до 2024 година ќе биде вкупно под два отсто, што е најбавно петгодишно темпо од 1960 година.
Таа институција смета дека забавувањето на најголемите економии, вклучително и САД, чи очекуван раст е намален за 0,5 отсто, може да навести нова глобална рецесија, помалку од три години од претходната.
Со оглед на кревките економски услови, секој нов неповолен развој на настаните, како што е инфлација повисока од очекуваната, драстично зголемување на каматните стапки за нејзино задржување, оживување на пандемијата на коронавирус или ескалација на геополитичките тензии – може да ја турне глобалната економија во рецесија, соопшти банката.
Забавувањето на растот ќе биде особено тешко за економиите во развој кои се борат со големи должнички оптоварувања, слаби валути и раст на приходите, како и забавување на деловните инвестиции.
Растот на Кина во 2022 година се намали на 2,7 отсто, што е втор најнизок раст од средината на 70-тите, бидејќи ограничувањата наметнати од пандемијата, превирањата на пазарот на недвижности и сушата влијаат на потрошувачката, производството и инвестициите таму, наведува Банката.
Институцијата објави дека кон крајот на 2022 година, дел од инфлацискиот притисок почнал да стивнува, со пониски цени на енергијата и стоките, но предупреди дека ризиците од нови нарушувања во снабдувањето се високи и дека покачената базична инфлација може да продолжи.
Тоа би можело да ги поттикне централните банки да ги зголемат каматните стапки повеќе од очекуваното во моментов, влошувајќи го глобалното забавување, се додава во соопштението.
