Триесетгодишен градежен инженер денеска е извлечен жив од под урнатините на срушена зграда, на петтиот ден откако силните земјотреси ја потресоа јужна Туркије, пренесува турската новинска агенција Анадолу.
Хикмет Јигитбаш е спасен во Антакија, Хатај, откако под урнатините мина 101 час.
Спасувачот Мустафа Ајдин разговараше со Јигитбаш за време на напорите за спасување и му вети дека ќе го прегрне кога ќе биде извлечен од урнатините, ветување што го одржа.
„Најмалку 18.342 лица загинаа, а 74.242 се повредени во двата силни земјотреси со јачина од 7,7 и 7,6 степени по Рихтер што во понеделникот ја потресоа јужна Туркије“, објави денеска Агенцијата за катастрофи на земјата.
