Експлозијата на тритол предизвика голем потрес во јужниот албански приморски град Саранда, од која целосно е уништен хотел, а оштетени се и најмалку 20 други деловни објекти.
-Саранда денеска се разбуди од звукот на силна експлозија во хотел, која предизвика паника кај граѓаните, додека експлозивот целосно го уништи трикатниот објектот. Пет килограми тритол бил поставен на влезот од хотелот, сопственост на С. Ч, кој се наоѓа на градскиот булевар, додека од експлозијата се оштетени и околните згради. За среќа нема информации за повредени, пренесуват албанските медиуми.
Според полицијата сопственикот на хотелот „Бизант“ кој работел само во летната сезона, додека сега бил затворен, имал недоразбирања со поранешниот косопственик, со кого биле во судски процес, како околу хотелот „Бизант“ така и за пицеријата сместена на првиот кат.
-Од 2002 година двајцата косопственици С. Ч. и Д. Е. се во судски процес за сопственоста на овој хотел. Не е познато дали експлозијата, што се случи во 5;52 часот е поврзана со овие конфликти, но службите целосно се ангажирани во утврдување на мотивите и откривање на сторителот, стои во полициското соопштение.
Експлозијата се слушнала низ цела Саранда, а жителите јавуваат дека предизвикала потреси слични на земјотрес. Количеството на употребеното експлозив било големо, бидејќи покрај уништувањето на хотелот и пицеријата, нанел штета и на речиси 20 други објекти.
Н. А.
