Повеќе од 3.000 работници во 61 компанија ширум Британија учествуваа во пробна четиридневна работна недела минатата година, а судејќи според првите резултати и реакции, повеќето од нив можеа трајно да ја задржат таа практика.
Компании од пиварници до продавници за риби и чипсови и развоен софтвер до фирми за регрутирање, им дозволија на работниците да доаѓаат на работа четири дена, наместо пет, помеѓу јуни и декември 2022 година.
Извештајот за проценка на влијанието, според Би-Би-Си, покажа дека тоа има „огромни придобивки“ особено за благосостојбата на вработените.
„Феј Џонсон-Смит мислеше дека е премногу добро за да биде вистина кога нејзиниот шеф рече дека може да има одмор секоја среда без намалување на платата. Како и повеќето вклучени работници, Феј откри дека е поздрава и посреќна поради пократкото работно време“, пишува Би-Би-Си.
Авторите на извештајот за резултатите тврдат дека наскоро „сите би можеле да имаат пауза во средината на неделата или тридневен викенд како што е нормално“.
Сепак, пред сите да се одлучат за четиридневна недела со целосна плата, работодавачите ќе треба да видат колку е зголемувањето на продуктивноста, пишува Би-Би-Си.
„Работниците ќе треба да креираат услуги и производи за четири дена што ги создаваа за пет, за да заработат доволно пари. Ваквиот раст на продуктивноста се покажа како несовладлив предизвик за економијата на Велика Британија“, се нагласува во текстот.
„Не знаеме што точно се случи со продуктивноста, но врз основа на голем број други показатели, приход, трошење, самопријавена продуктивност, добро вработување, имавме навистина добри резултати“, вели Џулиет Шор од Бостонскиот колеџ.
Од 61 компанија што учествуваа, 56 изјавија дека ќе продолжат со четиридневната недела, барем засега, додека 18 рекоа дека тоа ќе биде нивна постојана политика.
