Претставници на ЦИВИЛ, денеска се сретнаа со Mинистерот за правда, Кренар Лога, на која се дискутираа прашањата поврзани со претстојните измени во Изборниот законик, како и за изборните процеси воопшто. Претседателот на ЦИВИЛ, Џабир Дерала, го информираше министерот Лога за плановите на организацијата, како и за тековните активности поврзани со изборите, изборниот мониторинг, политичкото финансирање и препораките и идеите за реформи во изборниот систем.
На средбата посебно се дискутираше за активностите за формирање на Работната група за измени во Изборниот законик. Министерот Лога истакна дека е отворена понудата за претседател на Работната група да биде избран претставник на ВМРО-ДПМНЕ. Заеднички е ставот дека во овие процеси е неопходна конструктивна соработка и од политичките партии, и од невладиниот сектор
Со оглед дека изборите, претседателските и парламентарните, се предвидени за 2024 година, се отври и дискусија за тоа кои се приоритетите за измени и дополнувања на Изборниот законик, по што и двете страни заклучија дека тој процес мора да заврши најдоцна шест месеци пред да се одржат изборите, што е долгогодишна и цврста препорака на ОБСЕ, како и на ЦИВИЛ, а секако е и дел од законската регулатива. Во повеќето изборни процеси во изминатите десетина години повеќе, измени во Изборниот законик се правеа спротивно на овие препораки, често и само неколку дена пред да се одржат изборите.
Министерот Лога и претставниците на ЦИВИЛ беа согласни дека таквата пракса мора да престане. Исто така, двете страни се сосема согласни дека на земјава ѝ е потребен целосно нов Изборен законик, но за такво нешто, во пресрет на изборната година, нема услови, што не ја исклучува можноста подготовките за тој процес да започне веднаш.
На средбата што траеше повеќе од еден час, се дискутираа и низа други прашања поврзани со општествено политичките состојби и процеси во земјата и пошироко, како и нивното влијание врз изборните процеси. Во таа смисла, посебно беа истакнати прашањата поврзани со дезинформациите и пропагандата. Средбата заврши со заедничка заложба за блиска соработка во клучните прашања поврзани со изборите, но и други сфери поврзани со заштитата на човековите права и слободи.
Б. Јордановска
