Северна Македонија е рангирана на 38. Место од вкупно 180 земји во светот според Глобалниот индекс за слободата на медиумите на „Репортери без граници“.
Земјава бележи скок од 19 места во однос на 2022 година и е најдобро позиционирана во регионот на Западен Балкан, пред Црна Гора (39), Хрватска (42), Косово (56), Босна и Херцеговина (64) и Србија (91) и Албанија (96).
Споредувајќи период од десет години, во 2013-тата, Македонија беше на 123-тото место. Иако се чинеше дека во 2012 година Македонија го достигна дното, откако беше рангирана на 116. место, но слободниот пад, кој траеше од 2009. Година, кога земјата била на респектабилното 34. место, продолжи. „Репортери без граници“ во извештајот за годината го наведуваат и затворањето на новинарите Томислав Кежаровски и Зоран Божиновски.
Во извештајот на Репортери без граници за 2014 година, Македонија е рангирана на 117 место по медиумски слободи, со мало подобрување од 6 места во однос на извештајот од 2013 година.
Земјава во 2015-тата година е на 118-то место на ранг листата на Репортери без граници, посветена на слободата на печатот. Во Извештајот за годината беше наведено дека клеветата е отстранета од Кривичниот законик во 2012 година, но обвиненијата се заменети со граѓански постапки, каде се можни големи парични и затворски казни за новинарите и за сопствениците на медиумите. Најмалку 580 тужби за клевета се поднесени од крајот на 2014 година до 2015 година, неколку десетици од нив против новинари.
За 2016 година Македонија се наоѓа на 111. Место според индексот на слобода и земјата во Извештајот се нарекува „лошото момче на Балканот“. Според „Репортери без граници“, слободата на медиумите е намалена во целиот регион, но ерозијата на владеењето на правото е највидлива во Македонија. „Имаше многу извештаи за закани, насилство, малтретирање и за заплашување на новинарите за време на политичките демонстрации во 2016 година, но само неколку од одговорните беа гонети. Политичката нестабилност влијае на работата на новинарите и притисокот од владејачката партија ги натера некои од медиумите самите да се цензурираат“, се вели во извештајот за 2016 година.
За 2017 година Македонија е рангирана на 109-то место, што е напредок за две места во споредба со минатата година кога беше на 111-та позиција. Сепак, земјава е најслабо рангирана во споредба со земјите од регионот. Во делот на извештајот кој се однесува на Македонија се вели дека „систематските напади на слободата на медиумите била констатна појава за време на децениското владеење на Никола Груевски и ВМРО-ДПМНЕ, кое конечно заврши со изборот на новата влада во јуни 2017 година“. „За време на десетгодишното владеење, Груевски воспостави ниво на контрола врз медиумите што не можеше да се спореди со ниедна друга балканска земја, а многу опозициски медиуми мораа да згаснат“, е заклучокот на Репортери без граници кои оценуваат дека Јавниот радио-телевизиски сервис „сè уште е во служба на ВМРО-ДПМНЕ“, беше посочено во годишниот Извештај.
Во 2018-тата година Македонија е на 109-тото место, по што следува скок од 14 места во 2019-тата година. Земјава е позиционирана на 95-тото место. Во Извештајот се наведува дека не се регистрирани напади врз новинарите и безбедноста на новинарите бележи значителен напредок.
Од 95-то, во 2020 година следува нов скок од три позиции на 92-рото место. Во делот за Македонија се истакнува рекламирањето во медиумите, а „Репортери без граници“ во извештајот посочуваат дека актуелната влада го намалила државното рекламирање во медиумите, што беше моќна алатка на претходната власт за контрола на медиумите и злоупотреба на државните фондови.
Следната, 2021 година Македонија се наоѓа на 90-тото место, а дури 33 позиции напредок се бележи во 2022 година, па земјата беше 57-ма на ранг-листата. Тогаш беше усвоена нова методологија со која слободата на медиумите се дефинира како „ефикасна можност за новинарите, како поединци и како групи, да избираат, произведуваат и шират вести и информации од јавен интерес, независно од политички, економски, правни и социјални мешања, како и без закани за нивната физичка и ментална безбедност“.
ЦМТ
