Вториот товарен брод со украинско жито пристигна денеска во Истанбул преку Црното Море, и покрај заканите на Москва дека ќе ги нападне бродовите што влегуваат и излегуваат од Украина, се наведува на веб страниците кои го следат поморскиот сообраќај, пренесува МИА.
Бродот „Аројат“ кој плови под знамето на Палау тргна во петокот од Черноморска кај Одеса.
Тоа е вториот брод што помина низ тој поморски коридор. Од страна на Кијив беше воспоставен коридор долж западниот брег на Црното Море за да се заобиколи блокадата на Русија.
Според веб-страниците кои го следат поморскиот сообраќај, бродот „Аројат“ со 17.600 тони украинско жито, наменет за Египет, бил на јужниот излез од Босфор во Мраморното Море во 3 часот утринава. Бродот треба да се упати кон Дарданелите и понатаму кон Медитеранот.
