Британски војници патролираат на косовско-српската граница како дел од мировната мисија на НАТО, која е засилена поради загриженоста дека поранешните воени непријатели би можеле да се вратат во отворен конфликт по серијата насилни инциденти во последниве месеци, пишува денеска Ројтерс.
Алијансата испрати стотици дополнителни војници на Косово од Велика Британија и Романија, откако битката меѓу властите и вооружените Срби заробени во манастир, пред два месеца, го претвори тивкото село во северно Косово во воена зона.
Што се случи во Бањска?
Еден полицаец и тројца вооружени напаѓачи беа убиени во селото Бањска во најжестокиот инцидент откако Косово прогласи независност од Србија во 2008 година. Косово ја обвини Србија дека им обезбедува финансиска и практична поддршка на напаѓачите, тврдење што Белград го негира.
НАТО испрати дополнителни 1.000 војници во регионот, зголемувајќи го своето присуство таму на 4.500 мировници од 27 земји. Британските војници сега се распоредени во 18-часовни смени во студени услови со цел да се осигураат дека нема оружје или вооружени групи да влезат во Косово.
Што велат британските војници?
„Моментално сме овде во рутинска патрола, која се состои од разбирање на моделите на живот, добивање разузнавачки информации за која било незаконска или сомнителна активност што потоа се испраќа назад во КФОР (мисијата на НАТО)“, изјави потполковник Џос Гади од британската армија на границата со Србија.
За време на посетата на Западен Балкан во понеделникот, генералниот секретар на НАТО Јенс Столтенберг истакна дека Алијансата размислува дали е потребно потрајно зголемување на силите „за да се осигура дека тоа нема да излезе од контрола и да не создаде нов насилен конфликт на Косово или во поширокиот регион“.
Проблем со таблиците
Косово, кое има мнозинство етнички Албанци, прогласи независност од Србија во 2008 година по герилскиот бунт и интервенцијата на НАТО во 1999 година.
Околу пет отсто од населението во Косово се етнички Срби, од кои половината живеат на север и одбиваат да ја признаат независноста на Косово и го сметаат Белград за свој главен град. Тие често се судираа со косовската полиција и меѓународните мировни сили. Повеќе од две децении, многу етнички Срби одбиваат да регистрираат возила со косовски регистерски таблички, користејќи го наместо тоа нивниот сопствен систем, кој Приштина го смета за незаконски.
Владата на премиерот Албин Курти им одреди рок до 1 декември на околу 10.000 возачи да ги регистрираат своите автомобили со косовски таблички или ќе се соочат со високи казни. Слично барање предизвика насилство минатата година.
Г. Т.
