Раководството на СДСМ донело одлука да поддржи втор претседателски мандат на актуелниот претседател Стево Пендаровски.
Партиски извори информираат дека вчера на состанок на раководството на СДСМ е одлучено Стево Пендаровски да биде поддржан за кандидат за претседател на државата. Оваа одлука деновиве ќе се најде пред членовите на Извршниот и Централниот одбор на партијата. Наредните денови се веќе планирани средби со коалициските партнери, а на 3 – ти март ќе биде и официјалната промотивна конвенција.
-Пендаровски е победнички кандидат, со најголем коалиционен капацитет, кој заедно со СДСМ и со партиите од прогресивниот, демократски блок, силно ја споделува визија за европска иднина на државата. Тој во досегашниот мандат го врати интегритерот и кредибилитетот на институцијата Претседател и покажа што значи да се биде претседател за сите граѓани, велат од СДСМ.
Од друга страна ВМРО-ДПМНЕ објавија дека повторно ќе одат со Гордана Силјановска – Давкова за претседателски кандидат, која еднаш веќе изгуби од Пендаровски.
– Во врска со Јавниот повик за избор на кандидат на ВМРО-ДПМНЕ за претседател на Република Македонија ја информираме јавноста дека крајниот рок за поднесување на пријава истекува денес. На истиот се пријави проф-др Гордана Силјановска-Давкова која поднесе план, програма за работа и потребен број на потписи на делегати, се посочува во соопштението од ВМРО-ДПМНЕ.
Силјановска-Давкова беше канадидат на ВМРО-ДПМНЕ на претседателските избори во 2019 година и беше поразена од актуелниот претседател Стево Пендаровски.
Во претседателската трка со собирање на 10 илјади потписи ќе се обидат за влезат и Билјана Ванковска предложена од Левица, Арбен Таравари од албанскиот опозициски блок, претседателот на ГРОМ и градоначалник на Општина Карпош Стевче Јакимовски и Бошњачки демократски сојуз со Мерсиха Смаиловиќ, правничка и граѓанска активистка.
Свој кандидат најави и движењето ЗНАМ на Максим Димитриевски, а ДУИ се очекува денеска да го соопшти името на нивниот кадидат за претседател на државата.
Ј. Ѓ. / Фронтлајн