ЦивилМедиа започна серија прилози за корпоративната општествена одговрност, следејќи го глобалниот предизвик на големите светски компании по чија општествена одговорност се цени и нивниот успех.
Дефинирајќи ја корпоративната општествена одговорност и поставувајќи ги клучните прашања колку компаниите се општествено одговорни, а колку ја користат како маркетиншка алатка, ЦИВИЛ вниманието го насочи кон Северна Македонија и одговорноста на нашите компании.
Водејќи се по критериумот на големината и профитот остварен во 2023 година, ЦивилМедиа испрати прашања на оваа тема до 20 и повеќе компании, со цел да ја претстави корпоративната општествена одговорност пред јавноста со конкретни примери од компаниите кои својот приход и профит го реализираат во земјава.
Од компаниите побаравме да споделат примери, документи, стратегии за корпоративна општествена одговорност на компаниите и нивните достигнувања или проекти во таа насока.
Конкретно, прашањата што им ги поставивме на компаниите минатата недела се:
- Дали вашата компанија има стратегија за корпоративна општествена одговорност и во што се состои? (Ве молиме, споделете линкови или документи достапни за јавноста.)
- Кои се главните достигнувања и проекти на вашата компанија во областа на корпоративната општествена одговорност? (Ве молиме, споделете линкови или документи достапни за јавноста.)
Наскоро, ќе биде објавен списокот на компании до кои се обративме со овие прашања, како и нивните одговори. Македонски Телеком и Комерцијална Банка АД Скопје се првите компании што одговорија на нашите прашања.
Во меѓувреме, ЦивилМедиа ќе продолжи со објавување едукативни содржини за темата општествена одговорност. Редакцијата ги повикува сите што имаат информации и примери за корпоративната општествена одговорност, како позитивни, така и негативни, да ги споделат со јавноста преку нашата медиумска платформа. Сите информации ќе бидат дополнително проверени и верификувани.
Б. Јордановска
