ТЕМА НА ДЕНОТ
Владата го назначи Бојан Христовски за нов директор на Агенцијата за национална безбедност
Владата на Христијан Мицкоски го назначи Бојан Христовски за нов директор на Агенцијата за национална безбедност (АНБ). Тоа предизвика реакции во дел од јавноста и медиумите, затоа што Христовски извршувал партиски функции во ВМРО-ДПМНЕ, а тоа е во спротивност со стандардите на оваа институција важна за безбедноста на државата.
Според Законот за АНБ, член на политичка партија нема право да биде директор на Агенцијата, а Христовски до неодамна извршуваше конкретна партиска функција – претседател на Градскиот комитет на ВМРО-ДПМНЕ за Скопје. Исто така, во неговата биографија е и функцијата директор на Јавното претпријатие „Градски паркинг“ до септември 2022 година, кога поднесе оставка по конфликтот на актуелната градоначалничка на Скопје, Данела Арсовска, со Мицкоски и ВМРО-ДПМНЕ, партијата која ѝ помогна да седне на градоначалничкото столче.
СДСМ се противи на оваа, како што велат, политизација на безбедносните служби и бараат Христовски да биде разрешен и да биде назначен нов директор на АНБ. СДСМ ќе ги извести стратешките партнери, земјите членки на НАТО преку нивните амбасасади и Европската комисија.
Според СДСМ, со поставувањето на лице кое само до 2023 година беше претседател на Градскиот комитет на ВМРО-ДПМНЕ, оваа партија директно го прекршува член 10 од Законот за АНБ.
ИЗЈАВА НА ДЕНОТ
Проф. Пивоваров за ЦИВИЛ: Со Агенцијата за национална безбедност треба да раководи човек на државата – a не човек на партијата
„Меѓутоа, кај нас, за жал, 33 години се поставуваат партиски послушници на челните позиции и потоа ни се случуваат несакани работи како, на пример, масовното прислушкување во времето на Сашо Мијалков или Љубе Бошкоски. Со АНБ треба да раководи лице кое поседува интегритет и да си ја знеа работата. Тоа ти е како да ми дадете мене Ролс Ројс да возам, а јас не знам ниту Фичо да управувам. Кај нас треба да се почитуваат Уставот и законите, ни помалку ни повеќе. Меѓутоа, кај нас сè се сведува на тоа ‘стави го – наш човек е’“, изјави проф. Владимир Пивоваров за ЦивилМедиа.
РЕГИОН
Маринакис: Патот на Северна Македонија кон Европа поминува преку Грција и почитувањето на Договорот од Преспа
Патот на Северна Македонија кон Европа поминува преку Грција и почитувањето на Договорот од Преспа… Почитувањето (на Договорот од Преспа) е неопходен предуслов на овој пат, за ова не се разговара, ниту пак ќе се промени нешто во оваа констатација и позиција, која е и нашата национална позиција., рече портпаролот на грчката Влада Павлос Маринакис на денешниот брифинг со новинарите одржан во Солун.
СВЕТ
Еј-Би-Си Њуз: Нетанјаху одобри цели за одмазднички напад врз Иран, се чека конечна одлука
Израелски официјални лица потврдија дека премиерот на земјата Бенјамин Нетанјаху ги одобрил сите цели за планираниот израелски одмазднички напад врз Иран. Според изворот, Израел планира да одговори на нападот од Иран од 1 октомври, кога кон Израел беа испукани повеќе од 200 проектили.
ГРАЃАНСКА АКЦИЈА
ПРАШАЊЕ НА ДЕНОТ: На што се должи се поголемиот број на жртви во сообраќајот?
Подготви: Б. Јордановска
