ВЕСТ НА ДЕНОТ
Муртезани ќе дели зелен, жолт и црвен картон на министерствата за спроведување на Реформската агенда
Министерот за европски прашања, Орхан Муртезани денеска одржа брифинг со новинари, на кој ја презентираше Реформската агенда на Северна Македонија во период од 2024-2027 година, која вчера беше и официјално одобрена од страна на Европската комисија.
Реформската агенда е дел од Планот за раст на Западен Балкан од 6 милијарди евра, од кои земјава треба да добие 750 милиони евра, додека првата транша во износ од 52,5 милиони евра се очекува да стигне до крајот на годинава.
ИЗЈАВА НА ДЕНОТ
„Заканите и заплашувањата насочени кон медиумите ја поткопуваат демократијата, слободата на говорот и слободата на информирање. Безбедноста на медиумските работници е клучна за постоење на независни и професионални медиуми, кои се еден од главните стожери на демократските процеси и кои придонесуваат за унапредување на слободата на изразување“, велат од АВМУ, кои најостро го осудуваат чинот на опожарување на возилото на сопственикот на регионалната телевизија М-Нет, од Штип, Благој Серсемов, од страна на непознати сторители во дворот на неговата семејна куќа.
РЕГИОН
БиХ добива 20 милиони евра од ЕУ за санација на поплавените подрачја
Претседателката на Европската комисија, Урсула фон дер Лајен, изјави денеска во Сараево дека Босна и Херцеговина добила 20 милиони евра интервентни средства за санација на штетите во поплавените региони во Федерацијата БиХ.
СВЕТ
Шолц: Украина не може да влезе во НАТО се додека е во воена состојба
Германскиот канцелар Олаф Шолц изјави дека во моментов не постои можност Украина да биде поканета во НАТО бидејќи, како што наведе, земја во воена состојба не може да стане членка на Алијансата.
ГРАЃАНСКА АКЦИЈА
ПРАШАЊЕ НА ДЕНОТ: Што мислите за пречекот на Фон дер Лајен пред 2 години и сега?
СЛОБОДНА ЗОНА
„И сега, Мицкоски одеднаш треба да се откурчува, и при приемот на Фон фер Лајен, и во Брисел, и во Берлин, а неговите пратеници од разгоропадени дувачи во вувузели, одеднаш станаа мачиња. Исчезна и толпата од пред Собрание. Штама и кај вмровските ботови на социјалните мрежи.
Мицковски, по „курчењето“ додека беше опозиционер, сега, откако стана најистурениот претставник на државата, ја соблече маичката со испечатено „НЕ“, влезе во костум, стави вратоврска и почна да се откурчува. Изглед сфати дека ние сме мала земја, а и пари немаме“, пишува Драган Мишев во колумната „Курчење и откурчување“.
*
Не сум сигурен дека држи вода ставот дека гласачкото тело е доведено во заблуда. Таква мисла може да се слушне секогаш во разговорите на обичните граѓани. Почитувани сограѓани, ако не ни се слушаат мудрите мисли на филозофите барем имаме наше искуство за овие триесет и кусур години. Не се само политичарите криви што ние како граѓани сакаме да ни го кажат тоа што сакаме да го слушнеме. И со тоа ја избегнуваме одговорноста за нашиот избор, пишува Војо Маневски во колумната „Сила на состојбата“.
Д. Муратов
