ВЕСТ НА ДЕНОТ
Бугарија и Северна Македонија постигнаа договор за пругата на Коридорот 8
Вчера во Софија се одржа состанок на делегации од Македонија, Бугарија и претставници од Европската Унија во однос на железничкото поврзување, информираат од Министерството за транспорт.
Како што известуваат од Министерството, трите клучни аргументи на заменик претседателот на Владата и министер за транспорт, Александар Николоски беа прифатени. Прво, мора да има заеднички проект за тунелот со цел да не се гради тунел кој не води никаде, понатаму Бугарија да го заврши својот дел од пругата и трето да се ревидира цената која е превисока како и ревидиирање на самиот проект, соопштуваат од Министерството.
ИЗЈАВА НА ДЕНОТ
„На вчерашната седница за пратенички прашања не видовме одговори, туку пинг-понг препукувања. Во Македонија владее висока тензија и општествена поделеност која се рефлектираше и на вчерашната седница. Темите како што се уставните измени, евроинтеграциите дополнително ја подигна тензијата и негативната атмосфера во Собранието“, вели аналитичарот Петар Арсовски за ЦИВИЛ Медиа, по вчерашните први пратенички прашања во Собранието на новиот парламентарен состав.
РЕГИОН
Најмалку осум жртви, над 30 повредени откако се урна настрешница на железничката станица во Нови Сад
Осум лица загинаа во уривање на дел од Железничката станица во Нови Сад, соопшти министерот за внатрешни работи на Србија, Ивица Дачиќ.
Градоначалникот на Нови Сад, Милан Ѓуриќ изјави дека се повредени повеќе од 30 лица. Инаку, под настрешницата имало клупи и на нив во моментот на падот имало голем број граѓани јавија српските медиуми.
СВЕТ
Анкети за изборите во САД: Кој е во водство, Харис или Трамп?
Националните анкети во моментов покажуваат дека Камала Харис води пред Доналд Трамп за еден процентен поен – 48% наспроти 47%.
Има добра причина да се биде внимателен во врска со анкетите, бидејќи тие ја потцениле поддршката за Трамп на последните два избори – при што грешката на националните анкети во 2020 година е најголема во последните 40 години, пренесуваб Би-би-си.
ГРАЃАНСКА АКЦИЈА
ПРАШАЊЕ НА ДЕНОТ: Кои се вашите впечатоци од Седницата за пратенички прашања?
СЛОБОДНА ЗОНА
„Доколку со ваквата изјава Мицкоски мислеше да ги навреди пратениците на СДСМ, тој всушност ги посипа со пепел сите Македонци кои не извадиле бугарски пасош и не се пишале као Бугари. Не дека немале и тие економска потреба, како Сања Божиновска, едноставно решиле дека националната припадност и македонското потекло им е поважно од економските потреби, и не вреди да си го пр(е)одадат за разно разни олеснувања, како работа во странство, купување половно возило, глумење европски „гражданин“, пишува Драган Мишев во колумната „Мицкоски ја прогласи Сања Божиновска за голема Македонка, ги помножи со нула сите Македонци без бугарски пасош“.
*
„Проблемот е во тоа што политичките партии своето делување досега го насочуваа врз користење на буџетот за свои цели, полнење на администрацијата, помагање на компаниите кои ги сметаат за свои. Често со коруптивни дејанија на апаратот се зголемуваше и сивата зона на економијата која е под радарот на даночните органи, па предвидените приходи изостануваа“, пишува Војо Маневски во колумната „Буџетот не е чекмеже: За да се земат пари, треба и да се стават – за да има што да се земе“.
Д. Муратов
