ВЕСТ НА ДЕНОТ
Бојкот на наставата во две скопски основни училишта поради проблематичен ученик, формирана интердисциплинарна комисија по средба на МОН и Одборот на родители
Формирана е интердисциплинарна комисија во врска со случајот со третоодделенецот од Основното училиште „Лазо Ангеловски“ во Скопје кој требаше да биде префрлен во Основното училиште „11 октомври“. Комисијата ќе треба да го разгледа случајот и да донесе мерки коишто ќе бидат во интерес и на ученикот и на сите инволвирани страни.
– Министерството за образование и наука учествува во изнаоѓањето решение за случајот со ученикот со кој јавноста е веќе запознаена и во таа насока, на иницијатива на МОН е формирана интердисциплинарна комисија составена од претставници на министерството, Бирото за развој на образованието, општината, училиштето и социјалните служби, која се состанува за разгледување и преземање соодветно мерки и активности согласно законската регулатива, во чиј фокус се најдобрите интереси на ученикот, но и на сите инволвирани, велат од МОН.
Третоодделенецот од чие однесување се жалат родители од ОУ „Лазо Ангеловски“ во Ново Лисиче требаше да биде префрлен во ОУ „11 Октомври“ во Центар. Родителите на учениците од „11 Октомври“ ја бојкотираа наставата, а по повлекување на одлуката и негово враќање во матичното училиште „Лазо Ангеловски“, денеска празно остана и ова училиште.
Министерката за образование и наука Весна Јаневска вчера изјави дека случајот добил „преголема, непотребна и донекаде неправедна јавност, обем и јавна дискусија“.
ИЗЈАВА НА ДЕНОТ
Владата ќе помогне повторно ако пропадне тендерот за нафта за ЈСП, но тоа не може да оди во недоглед
– Како Влада сигруно нема да седиме немо и да набљудуваме, но да дадеме шанса и да видиме денес-утре да не има некоја повторна набавка да не се предомислат некои од економските оператори. Ако не, ние ќе мораме повторно како Влада да помогнеме, со одредена позајмица да интервенираме за Јавното сообраќајно претпријатие, но тогаш се поставува прашањето до кога вака. Навистина треба да се поведе сметка околку процесот на децентралзиација затоа што ако некој не може тоа да го прави, тогаш да интервенираме законски, барем да ги преземеме интегернциите и да ја стабилизараме состојбата, рече Мицкоски по прес-конференцијата во Владата.
РЕГИОН
Бугарија: И при десеттиот обид пратениците не успеаја да изберат претседател на 51-то Народно собрание
Во десеттиот обид, ниту еден од двајцата кандидати кои влегоа во вториот круг – Наталија Киселова и Силви Кирилов – не е избран за претседател на 51-то Народно собрание на Бугарија.
СВЕТ
Блинкен на состанокот на ОБСЕ го обвини Лавров за „цунами од дезинформации“
Американскиот државен секретар Ентони Блинкен денеска го критикуваше рускиот министер за надворешни работи Сергеј Лавров, обвинувајќи го за „цунами од дезинформации“ и ја осуди Москва за ескалацијата на конфликтот во Украина.
На состанокот на Организацијата за безбедност и соработка во Европа (ОБСЕ) на Малта, Блинкен изрази жалење што Лавров ја напуштил салата по своето обраќање, без да ги сослуша останатите учесници.
Полскиот заменик министер за надворешни работи, Владислав Теофил Бартошевски, изјави дека е „грешка“ ОБСЕ да го покани рускиот министер за надворешни работи Сергеј Лавров на средба во Малта.
ФОРУМ
ПРАШАЊЕ НА ДЕНОТ: Tреба ли проблематичните деца да се бркаат од училиште или да се работи со нив?
ИНТЕРВЈУ
Проф. д-р Стефан Детчев, Нов Бугарски универзитет: Решение ќе има кога бугарското општество ќе сфати дека ветото беше голема грешка, а македонското општество дека попуштањето пред популизмот на ДПМНЕ беше пат кон никаде
И по седмите парламентарни избори во неполни четири години Бугарија пак е без редовна Влада. На октомвриските избори ниту една од политичките сили не освои доволен број пратеници за самостојно или евентуално со уште една партија, да дојде до потребното мнозинство. А, што се однесува до темата Македонија, таа скоро и да не се споменува на Бугарската политичка сцена.
Во ексклузивно интервју за Цивил Медиа, професорот д-р Стефан Детчев од Нов Бугарски универзитет, ја оценува актуелната политичка состојба во Бугарија.
СЛОБОДНА ЗОНА
„Знам дека веднаш ќе бидам нападнат за неправда кон оние што досега ја исполнувале својата генерациска солидарност и уплаќале повеќе од таквата пензија, ама сите сме свесни дека реформите се нужни. Ако сега не ги започнеме реформите може да дојдеме во состојба пензиите секако да бидат социјална помош која државата ќе ја одредува и ќе ја плаќа од буџетот. Само тогаш со право политичарите ќе велат „ви ги покачивме пензиите и од нас зависи нивниот износ“. А можеби така и сака мојов народец. Кога веќе имаме господар тој и нека се грижи за сѐ, па и за пензиите. Македонијо, се претвораш во земја на пензионери и државна администрација“, пишува Војо Мнавески во колумната „Пензиите не се политичка, туку солидарна категорија“.
Д. Муратов
