Претседателката на Европската комисија, Урсула фон дер Лајен го поздрави договорот за прекин на огнот во Појасот Газа меѓу Израел и палестинското исламистичко движење Хамас, како и ослободување на заложниците, пренесоа светските агенции.
„Ова носи надеж во целиот регион, каде што луѓето трпат огромно страдање предолго“, напиша Фон дер Лајен на „Икс“.
Таа ги повика Израел и Хамас целосно да го спроведат договорот.
Високата претставничка за надворешна и безбедносна политика на ЕУ, Каја Калас рече дека сега е време да се спроведе договорот за доброто на сите заложници и нивните семејства, на луѓето од Газа и на луѓето во регионот. Во една статија на „Икс“, таа го опиша склучувањето на договорот како „голем, позитивен напредок кон ставање крај на насилството“.
Првиот европски лидер што реагираше беше еврокомесарката Дубравка Суица, која рече дека договорот ќе го донесе „многу потребното олеснување за оние кои се погодени од овој разорен конфликт“.
Претседателката на Европскиот парламент, Роберта Мецола, од своја страна, на „Икс“ изрази надеж за потенцијална „пресвртна точка за траен мир“. Според неа, планот може да дејствува како „катализатор за претворање на очајот во надеж“.
И германскиот канцелар Олаф Шолц смета дека договорот за прекин на огнот меѓу Израел и Хамас е можност конечно да се стави крај на војната.
„Добро е што се чини дека е постигнат договор за прекин на огнот и ослободување на заложниците – вклучително и Германци – во Газа! Сега договорот мора да се имплементира во целост“, напиша тој на „Икс“.
Сите заложници мора да бидат ослободени, а посмртните останки на починатите заложници да им бидат предадени на нивните семејства за достоинствено збогување.
„Примирјето дава можност за конечен крај на војната и подобрување на страшната хуманитарна ситуација во Појасот Газа. Ќе продолжиме да се залагаме за тоа“, напиша Шолц.
Шпанскиот премиер Педро Санчез го поздрави договорот, велејќи дека е „клучен за постигнување регионална стабилност“. Тоа е, исто така, „неопходен чекор кон решение со две држави и праведен мир што го почитува меѓународното право“, напиша тој на „Икс“.
Договорот „мора да стави крај на конфликтот, да ни овозможи да се справиме со страшната хуманитарна ситуација во Газа и да ги ослободиме сите заложници“, нагласи Санчез.
Според високиот комесар на ОН за човекови права Волкер Турк, договорот ветува „длабоко олеснување по толку многу неподносливи болки и страдања“.
Генералниот секретар на ОН, Антонио Гутереш го поздрави договорот за прекин на огнот во Појасот Газа, постигнат синоќа меѓу Израел и палестинската вооружена групација Хамас, нагласувајќи дека „сега приоритет мора да биде ублажување на огромното страдање предизвикано од овој конфликт“.
„ОН се подготвени да го поддржат спроведувањето на овој договор и да ја зголемат испораката на хуманитарна помош за безбројните Палестинци кои продолжуваат да страдаат“, изјави Гутереш за новинарите.
Египетскиот претседател Абдел Фатах ал-Сиси, исто така, го поздрави договорот и ја истакна важноста на брзата испорака на хуманитарна помош за Појасот Газа.
Фото: МИА архива
