Бројни студенти, средношколци и граѓани протестираат пред канцелариите на владејачката Српска напредна партија (СНС) на „Булеварот ослободување“ во Нови Сад за да им дадат поддршка на студентите кои рано утринава беа нападнати од приврзаниците на СНС во тој град.
Како што пренесува порталот Аналитика, сите четири коловозни ленти на булеварот Ослободување се блокирани.
Голем број студенти се упатија на протести што почнаа од универзитетскиот кампус со многу бучава, со свирежи, вувузели, труби и тапани.
На насобраните им се придружија моторџии и земјоделци на трактори, пренесува Данас.
Редарите, претежно професори од Универзитетот во Нови Сад, формираа кордон пред просториите на СНС, за да спречат инциденти.
Демонстрантите носат транспаренти „Дијалог“ со илустрација на крвава бејзбол палка како алузија на тепањето студенти и претходниот повик на режимот за дијалог „Доста е крв“, „Сите за еден, еден за сите“, „Бојата ќе се измие, крвта не“, „Нема да не газите“, „Палките ви се крвави“, и скандираат „Уапсете го Вучиќ“, „Оставките нема да ве спасат“, „Излезете надвор“, „Оставка па робија“.
Голем број граѓани се собраа и во Крагуевац. Демонстрантите се собраа пред зградата на БИА, по што започнаа со протестна прошетка до канцелариите на Српската напредна партија.
Се протестира и во Ниш – тамошните канцеларии на СНС се вандализирани, според N1, а демонстрантите стигнале до најголемата раскрсница во Ниш, во близина на трговскиот центар Делта.
SNS UBICE! 🚨#niš pic.twitter.com/z7ZjLN3tYx
— Mateja (@MATEJANIKOLlC) January 28, 2025
Полицијата во Нови Сад приведе четворица осомничени дека синоќа нападнале студенти во центарот на Нови Сад.
Припадници на МВР во Нови Сад ги уапсија Д.Р.(22), Н.Б.(22) и Н.Д.(22) од овој град и С.К.(30) од Сремски Карловци, поради постоење основи на сомнение дека го сториле кривичното дело прекршок насилничко однесување и тешка телесна повреда, објави Блиц.
Се сомничи дека четворица од нив синоќа во Нови Сад физички нападнале двајца млади момчиња и три млади жени и дека, во таа прилика, една млада жена била тешко повредена, а еден млад маж полесно.
При нападот се повредени двајца студенти, од кои студентот од Филозофскиот факултет е пуштен на домашно лекување. Студентот А.В.(23) бил примен во Ургентниот центар со тешки телесни повреди и се уште е под надзор во здравствената установа.
