Прометот во трговијата на мало во Хрватска, вчера до 15 часот паднал за 42 отсто, а бројот на издадени фактури е намален за 31 отсто во однос на петокот, 17 јануари, покажуваат податоците на хрватската Даночна управа.
Пад е забележан и на ниво на сите дејности, каде износот на фактурите за истиот период е помал за 23%, додека бројот на фактури е намален за 21% во однос на петокот пред две недели.
Ова е резултат на општиот бојкот што го повика платформата „Хало, инспекторе“. Поради високите цени беше одржан еднодневен бојкот на сите продавници, а потрошувачите вчера беа повикани да се воздржат од секакво купување.
Според Индекс. хр, Хрватските граѓани вчера потрошиле 16,5 милиони евра помалку од пред бојкотот. Од таа бројка, дури 14,4 милиони евра се однесуваат на продажба на мало.
Вчера започна еднонеделен бојкот на малопродажните синџири, Лидл, Еуроспин и ДМ и три производи – Кока-Кола и други газирани пијалоци, флаширана вода и детергент за садови.
Пред две недели, корисници на социјалните мрежи во Хрватска масовно споделуваа пораки преку кои повикуваа на бојкот на трговските синџири в петок, 24 јануари, поради високите цени на производите.
Податоците покажуваат дека потрошувачките цени во Хрватска, мерени според HICP, во декември 2024 година пораснале за 4,5 проценти во споредба со истиот месец од претходната година, што е највисок раст од мај. Хрватска е меѓу трите земји на ЕУ со највисока инфлација, по Романија (5,5 проценти) и Унгарија (4,8 проценти).
По Хрватска, црногорската невладина организација Институт алтернатива, ги повика граѓаните на Црна Гора на 31 јануари да ги бојкотираат супермаркетите и продавниците.
Бојкот на маркетите имаше вчера и во Северна Македонија, а резултатите од остварениот, односно неостварениот промет веројатно ќе бидат објавени подоцна.
Според податоците на Сојузот на синдикати на Македонија, минималните трошоци на едно четиричлено семејство во јануари се зголемени за 391 денар во однос на декември. Во делот на храната и пијалоците се бележи зголемување од 123 денари. Вредноста на синдикалната минимална кошничка за само една година пораснала за 6.089 денари што значи зголемување од 10,63 проценти.
Подготви: Д. Тахири
