ВЕСТ НА ДЕНОТ
Трамп ја најави првата средба со Путин во Саудиска Арабија
Американскиот претседател Доналд Трамп изјави во средата дека очекува да го види својот руски колега Владимир Путин во Саудиска Арабија на нивната прва средба откако републиканецот ја презеде функцијата, објави ПОЛИТИКО, пренесува ЦИВИЛ Медиа.
Трамп ги даде забелешките по речиси 90-минутниот телефонски разговор со Путин во кој двајцата лидери разговарале за ставање крај на целосната инвазија на Москва на Украина.
„На крајот очекуваме да се сретнеме. Всушност, очекуваме дека тој ќе дојде овде, а јас ќе одам таму, и ќе се сретнеме веројатно во Саудиска Арабија за прв пат, ќе се сретнеме во Саудиска Арабија, да видиме дали можеме да направиме нешто“, им рече Трамп на новинарите во Овалната соба.
ИЗЈАВА НА ДЕНОТ
Бугарско МНР: Прашањето за правата на Бугарите не е билатерален спор, туку е прашање кое влијае на темелните европски вредности и стандарди
Министерството за надворешни работи на Република Бугарија изразува длабоко разочарување и категорично ги осудува изјавите на претседателот на Владата на Република Северна Македонија, Христијан Мицкоски.
-Сакаме да нагласиме дека прашањето за правата на Бугарите во Република Северна Македонија не е билатерален спор меѓу нашите две земји, туку е прашање кое влијае на темелните европски вредности и стандарди.
Напредокот во процесот на европска интеграција на РСМ е можен само преку целосна и сеопфатна имплементација на Европскиот консензус, договорен и усвоен од Советот на ЕУ во 2022 година, чиј важен дел се измените на Уставот на РСМ.
Почитувањето на правата на малцинствата и обезбедувањето на нивната еднаквост се основни принципи на Европската Унија. Во овој контекст, Република Северна Македонија, како земја кандидат за членство во ЕУ, има одговорност да го усогласи своето законодавство и практика со овие принципи, се наведува во ставот на бугарското МНР.
РЕГИОН
Тензично во албанското собрание, опозицијата ја блокира говорницата, пратеник на ДП го искорна микрофонот
Опозициските пратеници ја блокираа говорницата на денешната седница во Парламентот на Албанија, кога збор зеде министерот за внатрешни работи, Таулант Бала.
Во еден момент од судирот бил забележан пратеникот на ПД Петрит Дода како го искорнал микрофонот и се обидел да го удри Бала.
Службениците за ред и мир излегоа и на говорницата и се обидоа да ја смират ситуацијата, по што седницата продолжи со уште една пресметка меѓу министерот Таулант Бала и пратеникот на Демократската партија, Фламур Нока.
СВЕТ
Хамас: Ќе го спроведеме договорот за примирје во Газа, ќе ги ослободиме заложниците според планираното
Хамас денеска соопшти дека ќе ги ослободи израелските заложници според планираното, со што треба да се реши големиот спор што се закануваше да го попречи примирјето во Појасот Газа.
Палестинската група во соопштението наведува дека ќе го спроведе договорот за примирје со Израел и дека египетските и катарските посредници потврдиле дека ќе работат на „отстранување на сите пречки“.
ПРАШАЊЕ НА ДЕНОТ: Што мислите за иницијативата за промена на државниот грб?
СЛОБОДНА ЗОНА
„Ароганцијата на премиерот е повеќе од очигледна – кога е во прашање одредување на најниската плата во земјата – среде општонародниот протест против постојаното ценовно стампедо што никако да добие знаци на стабилност. Без решение за кризата со цените, тој постојано бара начин да го одложи утврдувањето по која цена работодавецот ќе ја плаќа цената на трудот, која инфлацијата ја турка надолу. Мицковски смета дека работниците треба да ја сменат диоптријата со која гледаат на својата сѐ попразна трпезариска маса.“, пишува авторот Љубомир Костовски во анализата „ЛОГИКАТА НА МИЦКОСКИ: Ако немате за леб, јадете колачи“.
Подготви: Д. Тахири
