Откако во студентските домови беа делени материјали за „доброволно“ учество на денешниот протест во Скопје, и средношколците низ Македонија, меѓу кои најголем дел се малолетни, станаа дел од фокусот на интерес на Унијата на млади сили на ВМРО- ДПМНЕ, која е меѓу главните мобилизатори за приклучување на граѓаните на протестот на иницијативата „За заедничка Македонија“.
Дел од учениците од средното техничко училиште „Ѓорѓи Наумов“ од Битола кои посетуваат настава во првата смена, утрово ја напуштиле наставата и излегле во школскиот двор, како знак на поддршка на „идејата против двојазичноста“.
ЦИВИЛ Медиа разговараше со вработен во ова училиште, кој потврди дека имало прекин на наставата на дел од предавањата. Според просветниот работник кој сакаше да остане анонимен, тоа што најмногу загрижува е што еден професор и демонстраторот за одржување на компјутерите, вработени во училиштето од редовите на Унија на млади сили на ВМРО–ДПМНЕ, преку пораки во затворена ФБ група, во која дел се и учениците од прва, втора и трета година кои се малолетни, повикуваат учениците да не одат на настава и со тоа да ја изразат поддршката за барањата на „За заедничка Македонија“. И, потоа, да се приклучат на протестите, кои се најавени за денеска во Битола.
„Се загрижив кога моите ученици во прва година, кои имаат по 15 години, ми ги покажаа пораките напишани во затворената група, од вработени во нашето училиште“, вели анонимниот извор за ЦИВИЛ Медиа.
Директорот на училиштето денеска е во Скопје и не успеавме телефонски да стапиме во контакт со него, а деновиве во училиштето се присутни просветни инспектори.
Техничкото училиште во Битола, не е единствено каде помеѓу малолетници се промовираат ставовите на иницијативата „За заедничка Македонија“.
Во средното општинско училиште „Коле Нехтени“ во Штип, за време на одморите, средношколци го читале повикот за поддршка на „За заедничка Македонија“.
Во средното училиште „Раде Јовчевски- Корчагин“ во Скопје, во текот на вчерашниот ден, неколку наставници ја прекинале наставата и ги ослободиле учениците од присуство на последните два часа, за да се приклучат на протестот.
„Младите и средношколците сакаат унитарна Македонија во која поединецот ќе биде приоритет, а не етничките права. Разочарани сме од возрасните кои за да се доберат до власт и функција тоа го прават. Затоа, време е ние гласно да го кренеме нашиот глас и да кажеме НЕ за разнебитувањето на државата!“, се вели во наводниот повик на средношколците што беше објавен на провладините Интернет портали.
ЦИВИЛ- Центар за слобода во соопштението кое го објави вчера, уште еднаш остро ги осуди сите обиди за манипулација со малолетниците.
„Ги повикуваме родителите да не дозволат нивните деца да се вплеткаат во спиралата на насилството од кое нема враќање и со кое нивните деца и тие самите, ќе мораат да се носат целиот свој живот“, се вели во соопштението.
