Патувањето на сопругата на собранискиот спикер, Африм Гаши во Вашингтон со пари од буџетот на Собранието и вработувањето на сестрата на министерот за култура, Зоран Љутков во Народниот музеј во Велес за Државната комисија за спречување на корупцијата е законско. Ова беа само дел од одлуките на Комисијата која на денешната седница реферираше многу предмети, а за речиси сите се прогласи за ненадлежна или ги затвори.
За предметот за сопругата на Гаши ДКСК донесе одлука за запирање на постапката по пријавата за незаконска исплата на трошоци за патување во странство на сопругата на претседателот на Собранието Африм Гаши, бидејќи не биле потврдени и утврдени повреди на одредби од законот за спречување на корупција и судир на интереси.
Членот Сервет Демири на 15 седница на која се расправаше за овој случај побара да се достави препорака за доуредување на упатството на собранието кое ги регулира службените патувања со одредби по примерот на Кодексот на Владата за етичко однесување. Комисијата утврди дека актуелното Упатство за реализирање на службени патувања во странство, содржи правна празнина и недореченост. Ова беше една од причините партијата Левица да поднесе интерпелација во Собранието против Гаши.
Пријавата која ДКСК ја разгледуваше се однесува на покривање на трошоци за патување реализирано во период од 8 јули до 11 јули 2024 година на парламентарниот самит на НАТО во Вашингтон (САД). Членот на ДКСК, Сервет Демири посочи дека со пријавата биле доставени патни сметки без да биде наведено на кое лице се однесуваат. Тој потврди дека од Собранието на РСМ е доставена документација (покана, решение за патување, финансиска конструкција за патувањето, копија од дипломатска патна исправа и соодветна виза) кои биле разгледани.
-Утврдено е дека сопругата на претседателот патувала во странство, како дел од делегацијата, врз основа на решение донесено од секретарот на собранието. Анализата покажа дека трошоците се покриени од буџетот на собранието и дека постоела програма за брачните партнери и дека тоа е вообичаено при вакви настани – рече Демири.
Според него, за носителите на оваа функција треба да се применуваат истите стандарди како и за ПВРСМ (премиерот) како носители на највисока функција на извршната власт кои се содржани во донесениот Кодекс за етичко однесување за членовите на владата и носителите на јавните функции именувани од страна на владата донесен на седницата на 22.09.2020 година. Во него предвидено е, и дозволено со државни средства да бидат покриени трошоците за брачниот другар/другарка кога патуваат како дел од официјална делегација.
-Во таа насока, ДКСК препорачува Собранието да поведе инцијатива за дополнување на споменатото упатство и да се предвиди изрична одредба за регулирање на ваквите случаи, по примерот на кодексот на владата. Со оваа измена ќе се постигне правна усогласеност и јасност во постапувањето и ќе се спречи различно толкување на одредбите во иднина – рече Демири.
ДКСК утврди дека наводите од пријавата за сопругата на спикерот Гаши не се потврдени и дека не се утврдени повреди на одредбите од Законот за спречување корупција и судри на интереси поради што нема основ за натамошно постапување. По постапката е утврдено дека постојниот акт Упатство за реализирање на службени патувања во странство, содржи правна празнина односно недореченост.
Препорката на ДКСК до Собранието е да се покрене иницијатива за дополнување и треба да се одреди изрична одредба за регулирање на ваквите случаи по примерот на Членот 19 став 4 од Кодексот за етичко однесување на членовите на владата и носители на јавни функции кој дозволува покривање на трошоците за брачниот другар на ПВРСМ при службено патување. Со оваа измена, смета Демири ќе се обезбеди правна усогласеност и јасност во постапувањето во идентични ситуации.
Државната комисија за спречување на корупцијата и судир на интереси на денешната седница ја отфрли и пријавата против министерот за култура и туризам Зоран Љутков која се однесуваше на вработување на неговата сестра.
Во реферирањето на случајот со вработувањето Народниот музеј во Велес беше наведено дека Љутков не можел да влијае или да биде вклучен во постапката за вработување, со оглед дека основач на установата Народен музеј е општина Велес и таа е под ингеренции на локалната самоуправа.
Меѓу останатото на седницата беше кажано дека сестрата на министерот Љутков е вработена со договор на дело, а не како што е наведено во пријавата на неопределено време, а со тоа и постапката за нејзино ангажирање не била повредена.
Ова беа главните аргументи врз основа на кои ДКСК изгласа одлука за запирање на постапката против министерот за култура и туризам Зоран Љутков.
Извор: Слободен печат
Фото: ДКСК принтскрин
