Украина постигна договор за минералите со САД, изјави за Фајненшл Тајмс на Олха Стефанишина, заменик-премиер и министер за правда на Украина.
Од кабинетот на претседателот Володимир Зеленски потврдија за Кијив Индипендент дека е постигнат договор.
Преговорите околу договорот ги поттикнаа тензиите меѓу американскиот претседател Доналд Трамп и Зеленски во изминатата недела.
„Фајненшл тајмс“ објави дека Украина обезбедила поповолни услови за време на преговорите и дека договорот го обликува како начин за зајакнување на врските со САД. Се очекува Украинскиот кабинет на министри на 26 февруари да препорача потпишување на договорот, изјавија за Блумберг извори запознаени со дискусиите.
Зеленски најверојатно ќе замине за Вашингтон на церемонијата на потпишување во следните недели, според Фајненшл тајмс. Потпишувањето би можело да дојде веќе на 28 февруари, наводно изјавил за AFP висок украински функционер.
Конечната верзија на договорот, од 24 февруари, формира фонд во кој Украина ќе учествува со 50% од приходите од „идната монетизација“ на државните минерални ресурси, вклучувајќи нафта, гас и поврзана логистика. Фондот ќе инвестира во проекти во Украина.
Договорот ги исклучува ресурсите кои веќе придонесуваат за државниот буџет на Украина, што значи дека нема да ги покрие операциите на Нафтогас и Укрнафта, најголемите производители на нафта и гас во земјата.
Сепак, договорот не вклучува безбедносни гаранции од САД, на кои Кијив првично инсистираше.
Последниот нацрт на договорот ги отфрла претходните барања на САД за побарување од 500 милијарди долари за природните ресурси на Украина, кои беа голем проблем, според украинскиот медиум „Економска правда“, кој имаше увид во договорот.
Според ревидираните услови, фондот ќе добие 50% од приходите од инфраструктурата на Украина поврзана со ресурси, вклучувајќи ги и пристаништата. Заедничката сопственост ќе се утврдува врз основа на реалните финансиски придонеси, и додека управувањето ќе биде споделено, САД ќе имаат овластување за одлучување според сопствените закони.
Прашањата за уделот на САД во фондот и условите за „заедничка сопственост“ ќе бидат разгледани во последователните договори, според „Фајненшл тајмс“.
Зеленски претходно го отфрли предлогот на САД, наведувајќи го недостатокот на безбедносни гаранции и приговарајќи на структурата на отплата 1:2, која ќе бараше од Украина да врати два долари за секој добиен помош.
Администрацијата на Трамп го зголеми притисокот врз Украина да го финализира договорот во изминатите недели, при што Трамп јавно го нападна Зеленски, нарекувајќи го „диктатор без избори“ и го повика да „се движи брзо, или нема да му остане земја“.
Трамп го оформи договорот како начин за зајакнување на економијата на Украина, истовремено обезбедувајќи дека САД „ќе ги вратат десетици милијарди долари и воена опрема испратени во Украина“.
Д. Мишев
