Во Белград пред два дена се одржа првиот состанок на иницијативниот комитет за формирање национално движење за народот и државата, на кој присуствуваше и претседателот на Србија, Александар Вучиќ.
По средбата тој изјави дека е време да се артикулира големата сила на српскиот народ и да се обединат сите умови и патриотизам за да ја обликува посакуваната иднина.
На состанокот во Домот на кралот Петар Први, освен претседателот на Србија, присуствуваа уште 11 членови на иницијативниот комитет.
Како што претходно најави Вучиќ, во наредните денови и недели ќе се подготви се што е поврзано со движењето, кое ќе биде здружение на граѓани – од симболи и знаци до севкупната програма.
Од „Српска листа“ вчера посочија дека во име на српскиот народ од Косово го поддржува формирањето на движење за народот и државата, кое треба да ги обедини сите патриоти кои на прво место го ставаат напредокот на Србија и на сите нејзини граѓани.
Професорот д-р Борис Братина од Факултетот во Косовска Митровица објасни за каква политика ќе се залага Движењето за народот и државата и какви се очекувањата на граѓаните од него.
„Движењето пред се треба да се заснова на патриотизмот на нејзините членки, со тоа што секако треба да се одржуваат врски и со другите земји со кои имаме важни односи, како Русија, Кина, САД, ЕУ.
Што се однесува до домашната политичка сцена, за Движењето е важно што се работи за луѓе кои претходно не се занимавале со политика, односно не учествувале во работата на политичките партии. Во таа смисла тие се целосно политички неизвалкани.
Ми се чини дека тоа ќе биде големо Движење во кое нема да преовладуваат професорите и докторите, туку дека Движењето ќе биде нешто многу пошироко. Отворен е за прием на цели политички организации и поединци. Уште подобро ако тие лица не се ангажирани од политички партии“ – рече Братина и рече дека има големи очекувања од Движењето.
Што значи „Движењето за народот и државата“ на Вучиќ за Србите од Косово?
„Уште една форма на манипулација“.
Вака Ненад Рашиќ, лидерот на косовската партија За слобода, правда и опстанок, го гледа формирањето на „Движењето за народот и државата“ на иницијатива на српскиот претседател Александар Вучиќ, кое го поддржа и Српска листа – најголемата партија на Србите во Косово, која ја има поддршката од Белград.
Рашиќ, инаку министер во Владата на Косово, во изјава за Радио Слободна Европа оценува дека актуелната влада во Србија досега се „калкулирала“ со сите што мислат поинаку, вклучително и со Србите од Косово, и дека новото движење нема да донесе ништо ново.
За српскиот опозициски политичар од Косово, Милија Бишевац, формирањето на Движењето за народот и државата е „палка во рацете на диригентот, претседателот Александар Вучиќ“.
„Ова е само инструмент за замајување на населението дека започнува некоја нова приказна“, изјави Бишевац.
„На сите ни е јасно дека Српска листа е само спроведувач на политиката на официјален Белград. Српска листа никогаш немала никаква надлежност во носењето одлуки, освен што молчешкум слушале се што било нарачано од Белград и спроведувале многу лоша политика за Србите во Косово, смета тој.
Косовскиот министер за заедници и враќање, Ненад Рашиќ посочува дека Српска листа не може да зборува во името на целиот српски народ во Косово и дека нивната „опомена“ за такво нешто е резултатот на последните парламентарни избори во Косово, одржани на 9 февруари.
„Колку и да беа нерегуларни изборите во смисла дека (Српската листа) користеше различни методи на манипулација, тие не смеат да заборават дека околу 22 отсто од гласачите гласаа против нив, односно за другите политички партии. И покрај тоа, тие (Српската листа) се осмелуваат да го поддржат Вучиќ во име на сите косовски Срби“, изјави Рашиќ за РСЕ.
За Движењето за народот и државата не се знае многу, освен што неговото формирање го најави претседателот на Србија, Александар Вучиќ, пред околу две години. Неговиот фокус, како што во неколку наврати изјави Вучиќ, треба да биде иднината на Србија.
Последен пат за основањето на ова движење зборуваше во јануари годинава на партискиот состанок на Српската напредна странка во Јагодина, чиј основач е тој.
„Сите сте добредојдени во движењето, движењето на големи промени“, рече тогаш Вучиќ, но не прецизираше за кои „големи промени“ станува збор.
Подготви: Д. Тахири
