Ноќеска поголемиот дел од државата краткотрајно остана без напојување со електрична енергија. Граѓаните кои се обидоа да добијат информации на броевите за пријавување дефекти на ЕСМ, наидоа на „глуви“ телефони.
Како што информираа од АД МЕПСО, во раните утрински часови се случил дефект и краткотраен испад на 110 киловолтната преносна мрежа. Причина за овој прекин се високите напони на 400 киловолтната мрежа во целиот регион, што го афектираше нашиот систем и го предизвика краткотрајниот испад на енергетските трансформатори 400 /110 киловолти во трансформаторски станици..
-Станува збор за регионален и европски проблем со кои се соочуваат речиси сите преносни систем оператори поради нискиот транзит и конзум на електрична енергија во текот на ноќните часови и викендите во овој период од годината. Од настанување на испадот, екипите на АД МЕПСО експресно реагираа и за околу еден час по прекинот, нормализирано е напојувањето со електрична енергија во државата, соопшти АД МЕПСО.
Оттаму информираат дека нивните екипи продолжуваат да работат на целосно нормализирање на стабилноста на електроенергетскиот систем.
Дополнително, од МЕПСО истакуваат дека и понатаму будно се следи состојбата и се врши координација со преносните системи во регионот со цел да се обезбеди стабилност во системот и безбедност на корисниците со напојување со електрична енергија.
За време на неколку часовниот прекин на електричната енергија, во периодот помеѓу 5 и 7 часот утрово, кога пола држава остана без струја, не работеа ниту телефоните за пријавување дефекти на ЕВН, што дополнително предизвика паника кај граѓаните.
Граѓаните во отсуство на официјални информации, преку социјалните мрежи споделуваа објави за моменталната состојба со прекинот на елекрилната енергија во различни градови низ Македонија.
Д. Мишев.
