На 1.646-от ден од целосната руска инвазија врз Украина, Русија изврши нов масовен напад со ракети и беспилотни летала врз Кијив, Одеса и други украински региони. Нападот траеше во текот на ноќта и утрото на 27 август, со повеќекратни воздушни тревоги и активна противвоздушна одбрана во главниот град.
Амбасадорката на Украина во Северна Македонија, Лариса Дир, во објава на платформата X порача дека Русија уште еднаш покажува дека нејзината главна цел е терор врз цивилното население.
„Ден 1646. Петта воздушна тревога од ноќеска. Во Кијив и областа се оштетени гимназија, здравствена установа и станбени објекти. Во Одеса и областа се оштетени две образовни установи. Сега во Кијив дејствува ПВО. рф докажува – нејзината главна цел е терор врз цивилното население“, напиша Дир.
Според извори на ЦИВИЛ Медиа од Украина, во Шевченкивскиот реон на Кијив по рускиот напад биле оштетени простории на гимназија и комунална здравствена установа. Градоначалникот на Кијив, Виталиј Кличко, соопшти дека гимназијата претрпела значителни оштетувања, како и здравствената установа.
Ден 1646. Петта воздушна тревога од ноќеска. Во Кијив и областа се оштетени гимназија, здравствена установа и станбени објекти. Во Одеса и областа се оштетени две образовни установи. Сега во Кијив дејствува ПВО. рф докажува – нејзината главна цел е терор врз цивилното население. pic.twitter.com/kvX5aK79NO
— Larysa Dir (@dir_larysa) August 27, 2026
Во Кијив оштетувања се регистрирани и во повеќе други реони. Според украинските извори на ЦИВИЛ МЕДИА, меѓу погодените објекти има станбени згради, автомобили, образовни установи и здравствен објект. Во Кијивската област, според Ројтерс, двајца луѓе биле повредени, а нападите предизвикале пожар во магацински простории, оштетувања на други магацини и приватни куќи.
Одеса и Одеската област беа под напад речиси цела ноќ и утрото. Според Укринформ, повикувајќи се на началникот на Одеската градска воена администрација, Сергиј Лисак, во Одеса биле оштетени инфраструктура, образовна установа и повеќекатна станбена зграда. Други украински извори, повикувајќи се и на ДСНС, јавуваат дека нападите во Одеската област оштетиле инфраструктура, образовни објекти и станбени објекти, а службите за итни интервенции работеле на местата на ударите.
Украинските воздухопловни сили соопштија дека Русија во нападот употребила две противбродски ракети „Оникс“, балистички ракети „Искандер-М“/KN-23 и 258 ударни беспилотни летала од типот „Шахед“, „Гербера“, S8000 „Бандерол“ и дронови-мамки. Според истите податоци, украинската ПВО соборила или неутрализирала 233 воздушни цели, меѓу нив една ракета „Оникс“, седум балистички ракети, три „Бандерол“ и 222 беспилотни летала.
Напади и последици се регистрирани и во други региони. Во Кривиј Рих, според Укринформ, бројот на повредени по ноќниот руски ракетен напад врз индустриски објект се зголемил на три лица. Во Запорижја и околината, украинските власти јавија за најмалку седум повредени, меѓу нив три деца, по руски напади врз градот и околните населени места.
Украинскиот министер за надворешни работи Андриј Сибиха оцени дека масовниот руски удар бил насочен кон пристаништа, складишта за жито, енергетска, индустриска и друга инфраструктура. Reuters јави и дека пет дронови навлегле во воздушниот простор на Молдавија за време на нападот.
Овие напади доаѓаат по серија руски удари врз украински градови, железничка и пристанишна инфраструктура, енергетски објекти, училишта, болници и станбени згради. Само во последните недели, Русија повторно ја засили употребата на балистички ракети, реактивни дронови и комбинирани напади.
Пораката од Кијив останува иста: на Украина ѝ се потребни повеќе системи за ПВО, повеќе ракети-пресретнувачи и посилен меѓународен притисок врз руската воена индустрија. Секој напад врз гимназија, здравствена установа, станбена зграда, пристаниште или магацин за жито ја потврдува оценката на амбасадорката Дир: главната цел на руската агресија е терор врз цивилното население.
ЦМ Деск
