Државниот завод за ревизија го објави Конечниот ревизорски извештај од ревизијата на регуларност на политичките партии СДСМ, ВМРО – ДПМНЕ, Демократска унија за интеграција (ДУИ), Движење БЕСА, Алијанса за Албанците, Алтернатива.
Целта на ревизијата е да се оцени дали финансиското работење на партиите е во согласност со законските прописи и стандардите за финансиско известување, со посебен акцент на транспарентноста и одговорното трошење на буџетските средства.
Мислење со резерва
Ревизорските извештаи се за 2023 година, а ДЗР по однос на финансиските извештаи и усогласеноста изразува скоро за сите партии мислење со резерва. Таа резервираност ДЗР ја базира претежно на утврдените системските слабости и клучни наоди за секоја партија поединечно.
Клучната системска слабост на сите партии е: преиспитување во делот на финансирањето на изборната кампања со средства од редовната сметка на политичката партија. За СДСМ и Алтернатива се нагласува дека е поврзана со член 88 од Изборниот законик, кој се однесува на средствата за спроведување на изборите.
Друга заедничка слабост на сите партии е донесување поконкретни насоки за регулирање на начинот на плаќање, уплата и евидентирање на членарината како извор на финансирање на политичките партии.
За ВМРО-ДПМНЕ во клучни утврдени состојби стои: Забрана за привремено располагање со дел од имотот на политичката партија преку поведена постапка во 2018 година, која влијае на проценетата вредност на дел од недвижниот имот искажан во Билансот на состојба.
За СДСМ во клучни утврдени состојби стои: за дел од градежните објекти, наследени од правниот субјект претходник на партијата не e решен сопственичкиот статус, поради што истите не се воведени во евиденцијата кај надлежната агенција и во сметководствената евиденција на партијата.
Позитивно мислење и усогласеност во финансискиот извештај за 2023 година, ДЗР даде на БЕСА.
Б. Ј.
