Во израелски напад загинаа 15 лица, вклучувајќи жени и деца, собрани пред здравствен центар во централниот град Деир Ал Балах во Газа во четврток, според медицинскиот персонал и службениците во енклавата, јави Си-Ен-Ен.
Болницата „Мачениците Акса“ во Газа соопшти дека осум од убиените во нападот биле деца, најмладиот има две години, а најстариот 14 години. Исто така, се наведува дека се убиени три жени и четири мажи.
На снимките добиени од Си-Ен-Ен, неколку деца се гледаат како лежат неподвижно, а други изгледаат повредени среде звукот на вресоци. Друго видео прикажува неколку деца, крвави и неподвижни, како се транспортираат на количка.
Израелската војска соопшти дека целта била милитант на Хамас кој учествувал во нападите на групата врз Израел на 7 октомври 2023 година.
„(Израелските одбранбени сили) се свесни за извештаите за голем број повредени лица во областа. Инцидентот е во фаза на разгледување. Израелските одбранбени сили жалат за секоја штета на неинволвирани лица и работат на минимизирање на штетата колку што е можно повеќе“, соопшти израелската војска во изјава за Си-Ен-Ен.
Генералниот директор на Министерството за здравство на Газа изјави дека нападот се случил во близина на медицински центар каде што на жените им се дели бебешка формула.
Д. Т.
