Џабир Дерала
На 7 јуни 2026 година, под мотото „Твоја држава – твоја шанса“, Социјалдемократскиот сојуз на Македонија (СДСМ) го одржа својот 32. Програмски конгрес. Овој настан беше во духот на континуираните активности за идеолошко консолидирање на партијата под водство на Венко Филипче, позиционирајќи ја како бедем против авторитаризмот и ексклузивен гарант за европската иднина.
Враќање кон левицата: Економија пред сѐ
Според официјалните соопштенија од СДСМ, лидерот Венко Филипче ја мапираше новата насока исклучиво низ призмата на социјалната и економската политика, остро критикувајќи ја актуелната власт на ВМРО-ДПМНЕ за економски застој и партизација на институциите.
„Овој конгрес е потврда дека СДСМ цврсто се држи до суштината на социјалдемократијата: правда наместо привилегија, солидарност наместо страв, фер оданочување наместо товар врз трудот, силни институции наместо партиска држава и европска иднина наместо националистичка магла“, порача Филипче.
СДСМ јасно предупреди дека блокираната реформска агенда и одбивањето да се донесат клучните закони за пристап до фондовите на ЕУ се закануваат вратите на Унијата да останат затворени со децении.
Регионален фронт: Пораките од „Скопската иницијатива“
Дека потребата од јасен антинационалистички фронт е реална, потврдија меѓународните гости. Конгресот се надоврза на „Скопската иницијатива“ – заедничка декларација со сестринските партии потпишана на 6 јуни. Говорниците од регионот испратија синхронизирана порака за обединување:
Срѓан Миливојевиќ од ДС, Србија, испрати силна антикорупциска порака, поврзувајќи ги регионалните режими.
„Мафијата ја завршува својата епоха на Западен Балкан. Европа бара чисти раце и чист образ“, порача Миливојевиќ од говорницата на конгресот на СДСМ.
Гостинот од ЛСВ, Војводина, Бојан Костреш го оцени Конгресот како пресвртница во борбата против десничарскиот популизам, порачувајќи дека овие настани се „почеток на слободна и европска Северна Македонија“.
Истакнувајќи ги братските врски, Марко Кричка од СДП, Хрватска, го понуди хрватското искуство: „Социјалната демократија секогаш била најсилна кога била најхрабра“.
Емотивна поддршка стигна и од Иван Вујовиќ од СДП, Црна Гора, кој порача дека граѓаните на земјата ја „зачувале душата“, додека Маркус Олави Каупинен (Социјалдемократи, Шведска) го донесе европскиот контекст на решавање на реалните граѓански проблеми.
Опозиција соочена со проевропска фасада и заробена држава
На овој 32. Конгрес СДСМ демонстрираше регионален потенцијал и намера да се фати во костец со најсериозните предизвици во економско-социјалната сфера и навести идеолошко ресетирање. Овој настан на партијата се случува во време кога земјата се соочува со длабока структурна криза и низа други огромни предизвици.
Северна Македонија денес е сериозно заглавена во густа мрежа на хибридна дезинформациска пропаганда, националистички популизам и длабоко вкоренета корупција. Актуелната власт – по урнекот на авторитарниот модел во Србија – вешто одржува козметичка проевропска фасада кон надвор, додека на домашен терен спроведува забрзана операција на заробување на државата (state capture). Во оваа стратегија, системската етничка сегрегација и дискриминацијата се наметнати како примарно погонско гориво за дефокусирање на јавноста и долгорочно задржување на моќта, чија основна цел е да се амортизираат ефектите од растечката сиромаштија, изолација и нестабилност.
Во ваков контаминиран политички амбиент, опозицијата, вклучително и СДСМ, се соочува со исклучително тешки предизвици кои бараат нови решенија. Во овој контекст, на површина избива програмскиот вакуум на СДСМ кој се однесува на клучните прашања од сферата на меѓуетничките односи. Неможноста недвосмислено да се адресира и заштити вистинскиот карактер на мултиетничкото општество останува нивната најранлива точка во битката против националистичкиот популизам и авторитарниот карактер на власта.
П.С. Заложбата за ЕУ е невозможна без бескомпромисна, недвосмислена и јавно артикулирана борба за заштита на мултиетничкото општество и искоренување на дискриминацијата во земјата. Следи анализа на капацитетите за соочување со системската етничка дискриминација во земјата.
Creative Commons 4.0 | Задолжително наведување на изворот | ЦИВИЛ МЕДИА
Во ера на дезинформации, националистички популизам и авторитаризам, неопходна е вашата поддршка за ЦИВИЛ
Поддржете ги независните медиумски платформи на ЦИВИЛ во борбата против дезинформациите, национализмот, хибридните закани и авторитаризмот
Дајте го својот придонес СЕГА
