До попладневните часови на 3 ноември, по македонско време, гласањето се одвива во сите американски сојузни држави. Првите резултати се очекуваат во текот на ноќта, откако ќе започне затворањето на избирачките места.
Според Изборната лабораторија на Универзитетот во Флорида, повеќе од 57 милиони граѓани веќе гласале предвреме, лично или по пошта, заклучно со 2 ноември.
Изборите во бројки
На гласање се:
- 210 милиони регистрирани гласачи (250 милиони со право на глас)
- 435 места во Претставничкиот дом;
- 35 места во Сенатот, вклучително и два специјални избора;
- 36 гувернерски функции;
- 5.587 изборни трки за законодавните тела на сојузните држави.
Републиканците влегуваат во изборите со 53 сенатори, наспроти 47 од демократскиот блок, вклучувајќи двајца независни сенатори. Во Претставничкиот дом имаат 218 места, демократите 214, еден пратеник е независен, а две места се испразнети.
За преземање на мнозинството, на демократите им е потребна нето-добивка од четири сенатски и три пратенички места.
Клучни трки и изборни проблеми
Посебно внимание привлекуваат сенатските избори во Алјаска, Мејн, Северна Каролина, Охајо, Тексас, Мичиген и Џорџија. Во Претставничкиот дом, неколку десетици конкурентни изборни единици можат да ја определат конечната распределба на мандатите.
Според Асошиејтед прес, во округот Вестчестер, Њујорк, се пријавени проблеми со машините за гласање, поради што дел од ливчињата се чуваат за подоцнежно пребројување. Поплавите предизвикале промени на избирачките места во Флорида и делови од американскиот југозапад.
Министерството за правда распореди приближно 1.000 федерални изборни набљудувачи и монитори во сите 50 држави. Засега нема потврдени докази за организирана изборна измама што би го довела во прашање регуларното одвивање на гласањето.
Резултатите допрва следуваат
Според централноевропско време (CET), гласањето на изборниот ден за изборите во САД ќе заврши во среда, 4 ноември 2026 година, во 07:00 часот наутро CET. Последните избирачки места во САД се затвораат на Алјаска (островите Алеути) во 01:00 часот по полноќ по источноамериканско време (ET) во среда. САД се вратија на стандардното сметање на времето на 1 ноември, разликата меѓу источноамериканското време (ET) и централноевропското време (CET) изнесува точно шест часа.
Конечните изборни резултати и одговорот на прашањето која партија ќе ја преземе контролата врз Конгресот најверојатно нема да бидат познати веднаш на самата изборна ноќ и целиот процес може да трае со денови или недели. Сепак, првите прелиминарни резултати и проекции за одредени сојузни држави каде што разликата е голема ќе почнат да се објавуваат уште во изборната ноќ, поточно во првите часови по полноќ на 4 ноември по централноевропско време.
Изборите ќе покажат дали републиканците ќе ја задржат контролата врз двата дома на Конгресот или ќе се воспостави нова политичка рамнотежа во Вашингтон.
Џ. Д.
ПОДДРШКА ЗА ЦИВИЛ. ДОНИРАЈТЕ ДЕНЕСКА.
Ако го цените тоа што го прави ЦИВИЛ, поддржете ја нашата работа.
Вашата поддршка ни овозможува да известуваме, да ја одржуваме платформата за демократски дијалог, да објавуваме едукативни содржини, да се бориме против лагите и да ги браниме човековите права и слободата.
Поддржете го ЦИВИЛ. Донирајте ДЕНЕСКА.
