Над 11.000 членови на ВМРО-ДПМНЕ и официјално се изјасниле дека бараат реформи на партијата. Тие веќе не го кријат незадоволството и револтот од Никола Груевски и неговата клика, којашто ѝнанесе огромни, неповратни штети на партијата. Како што информираат од Републичкиот штаб за реформи на партијата, веќе имаат огромен број приврзаници на нивните заложби, речиси во сите градови во државата. Штип, Охрид, Демир Хисар, Велес, Крива Паланка, Гевгелија, Куманово, Прилеп, Тетово, Гостивар, Дебар и други градови, се на листата со приврзаници на реформскиот процес. Масовно се зачленуваат и од Унијата на жени на ВМРО-ДПМНЕ.
„Никола Груевски, мора да замине! Тој веќе нема легитимитет да биде претседател на партијата! Мора да се врати демократијата во партиските редови и да се освои победа на следните парламентарни избори!“, категоричен е Александар Цезар Коневски, член на Републичкиот штаб за реформи на ВМРО-ДПМНЕ.
Како што вели, на почеток средбите со приврзаниците се одржувале тајно, но, само за неполни три месеци порасна бројот на приврзаниците, па состаноците се одржуваат на јавни места ширум Македонија. Се одржуваат панел-дискусии, а незадоволните членови не го кријат револтот од Груевски и од неговите луѓе. Според Коневски, локалните избори се тешка битка за ВМРО-ДПМНЕ.
„Со нереформирана партија, со кандидати делегирани по теркот на кликата на Груевски, тешка ќе биде битката. А, нашите заложби се ВМРО-ДПМНЕ, секогаш да биде изборен победник!“, акцентира Коневски.
„Ние сме народна партија и одбиваме да влеземе во мегаломанските објекти, што со парите од граѓаните ги градеше Груевски, за да го задоволи својот хедонизам. Луксузирањето на кликата, ‘белиот дворец’ во Скопје, припаѓа само на врхушката, а не на народот, кој бара здрава и силна партија, што се грижи за потребите и интересите на чесниот човек“, дециден е Коневски.
Моника Талеска
