Нацрт–стратегија за реформа на правосудниот сектор со Акциски план е презентирана денеска во Охрид, на средба на Работната група при Министерството за правда.
„Владата има цврста одлука и политички консензус за решителни реформи во правосудниот сектор, во насока на враќање на довербата на граѓаните во правосудниот систем, подобрување на пристапот до правда за сите граѓани, целосно владеење на правото и инсталирање на меритократијата во овој сектор“, порача ресорниот министер, Билен Саљији.
Тој ги повика сите, особено опозиционите партии, да ги подржат идните законски проекти, што произлегуваат од оваа Нацрт-стратегија, а се исклучиво во интерес на граѓаните на Република Македонија.
Заменик министерот за правда, Оливер Ристовски, го истакна значењето на инклузивноста на експертите и на јавноста во процесот на создавање на Нацрт-стратегијата, укажувајќи на заложбата за целосна транспарентност во следниот период.
„Прво, оваа Стратегија заедно со Акцискиот план ќе ја објавиме целосно на веб-страницата на Министерството, како и на Единствениот национален електронски регистер (ЕНЕР), што досега не било пракса. Во наредните дваесетина дена, целата јавност ќе може да ја прочита, анализира и да даде свои сугестии за овој значаен документ. Откако ќе ги обработиме сугестиите, Стратегијата ќе влезе во Владина процедура, но принципот на инклузивност не завршува ни тука. Од оваа Стратегија ќе произлезат многу законски решенија од кои најважните се клучни системски закони како Законот за судови, Законот за јавно обвинителство, Законот за Судски совет, Законот за Совет на јавни обвинители“, изјави Ристовски.
Проф.д-р Ана Павловска – Данева, која е претседател на Работната група, ги потенцираше клучните и конкретни насоки за реформа на правосудниот сектор: независност и непристрасност, унапредување на квалитетот на институциите, што го сочинуваат правосудниот сектор, одговорност, ефикасност и транспарентност.
Таа потенцираше дека е невозможно, накусо да се образложат сите мерки што се предвидени во овој документ.
„Затоа ве повикувам да го прегледате, прочитате и анализирате, а во наредниот период, Работната група ќе биде на располагање да ги слушне и онаму каде е соодветно, да ги имплементира евентуалните сугестии на јавноста“, повика професорката Павловска – Данева.
