Непосредно пред дочекот на Новата Година, сведоци сме како градовите во светот се подготвуваат за највеселата и најлудата ноќ, преку украсување и организирање разни културно-забавни и комерцијални активности за нивните сограѓани и гостите да се чувствуваат што поубаво и во што е можно поубав амбиент да ги пречекаат претстојните празници.
Во Тетово, ништо од ова не се случува. Новата година како да не е празник. Ако сакате со некоја слика да ја илустрирате предновогодишната атмосфера и покрај напорот што ќе го вложите, тешко ќе успеете во намерата.
Вчера во Тетово можеше да се сведочи на два такви настани. На градскиот плоштад почна да се монтира една тешка метална конструкција во облик на елка и со оглед на темпото на монтирање тетовчани може само да се надеваат дека ќе биде готова до новогодишната ноќ. Како ни претходните четири години, така ни оваа, нема најави за новогодишна прослава на јавен простор во градот.
Карактеристично за овој дел од годината е тоа што голем број наши сограѓани што се на печалба во странство ги користат новогодишните празници да ги посетат своите родни огништа и заедно со најмилите да ги поминат празниците. Токму тие се мета на сообраќајната полиција и на пајак службата деновиве. Секое погрешно паркирање на печалбарите се користи за нивно казнување. Печалбарите, пак, се соочени со сообраќајниот хаос во градот и недостатокот на паркинг места.
Нешто што ги шокира гостите, а помалку домаќините кои се веќе навикнати на тоа, се и петардите кои експлодираат со силина на вистински бомби и навистина можат да престрашат па дури да предизвикаат вистински шок.
Тоа е сликата на Тетово деновиве пред дочек на Новата година. Тетово изгледа тажно, валкано и запуштено. Никаде ги нема чистачите кои пред локалните избори секојдневно ги метеа и ги чистеа тротоарите и улиците. Како да ги изметија и сите надежи за живот во Тетово. После изборите сите проекти и активности на локалната власт запреа.
Тротоарот во строгиот центар на градот веднаш до културниот дом Иљо Антески – Смок каде е сместена Уметничката академија на ДУТ стои раскопан од април годинава. Тој простор се користи и како дива приградска автобуска станица па секогаш е полн со луѓе кои се давеа во прашина цело лето, а очигледно ќе цапаат во кал и претстојнава зима. Во деловите на градот каде се направени тротоарите а особено околу градското пазариште и на булеварот Маршал Тито (по ново Илирија) се узурпирани од дивите препродавачи и тезги каде на црно се продава сѐ и сешто и го ограничува слободното движење на граѓаните.
За разлика од преполните диви тезги околу пазариштето градскиот пазар е повеќе од половина празен, а другата половина е претворена во вистински панаѓур каде се продаваат се помалку земјоделски производи, а се повеќе облека, обувки и разни други производи со сомнително потекло и квалитет. Долго најавуваниот мост преку реката Пена во близина на старото медицинско училиште што треба да придонесе за намалување на сообраќајниот хаос во тој дел од градот се гради веќе две години и сѐ уште не е готов. Дури и покрај помпезното пуштање на новиот водовод непосредно пред локалните избори сѐ уште има прекин на водоснабдувањето во одделни населби со изговор дека градската водоводна мрежа е стара и поради тоа се случуваат често дефекти. Сообраќајниот хаос е уште поголем, воздухот е и понатаму загаден, а хаосот во урбанизмот продолжува со исто темпо.
Старо-новата градоначалничка на Тетово сеприсутна во јавноста во предизборниот период, кога буквално се прегрнуваше со кого стигна, едноставно ја снема, по добивање на вториот мандат. Сега, после изборите се зборува низ Тетово дека сакала да се прегрне постизборно со досегашните лути политички противници од ДПА, но тоа не го дозволувале некои нејзини сопартијци.
После локалните избори во другите општини низ Македонија се утврдуваа долговите што ги оставиле нивните претходници, се формираа совети, се правеа планови и се донесуваа локалните буџети за наредната година. Ништо од ова не видовме во Тетово. Никој не кажува колкави се долговите на општината, советот сѐ уште не може да избере претседател, а за буџетот за наредната година изгледа ќе почекаме.
Ете тоа е предновогодишната слика од Тетово. Животот не само што не стигнал во Тетово, туку, како што велат тетовци, нема ни да дојде.
Текст и фотографија: Перо Наумовски
