На денешниот брифинг, Народниот правобранител, Иџет Мемети ги информираше новинарите за преземените мерки и констатирани состојби од постапувањето по преставките од страна на Пратеничката група на ВМРО-ДПМНЕ и Коалцијата за подобра Македонија, во врска со приведувањето на тројца пратеници на 28 ноември годинава.
„Народниот правобранител по разгледување на одговорот и целокупната документација приложена од Минситерството за внатрешни работи, како и од утврденото при посетата на Затворот Скопје неспорно констатира дека при приведувањето на пратениците и нивното лишување од слобода на 28.11.2017 година е повредено правото на пратенички имунитет утврден со член 64 од Уставот на Р.М., и членовите 53-59 од Деловникот на Собранието, на начин што полициските службеници не се придружувале до правните процедури за приведување определени со член 19 од Правилникот за начинот на вршење на полициски работи“, соопшти Мемети.
Според член 19 од Правилникот „ако лицето кое се приведува се повика на статус кој му дава имунитет полицискиот службеник по проверка на веродостојноста на исправите со кои се докажува таквиот статус, ќе го прекине приведувањето, и за тоа веднаш ќе го извести непосредниот раководен полициски службеник“.
Според став 4 од истиот член, „во случај кога не му е одземен имунитетот и покрај писмената наредба за негово приведување, истото нема да се изврши, а надлежниот суд ќе се извести од страна на полицискиот службеник за причините поради кои не е постапено по наредбата“.
„Народниот правобранител констатира дека со приведување на пратеници кои уживаат имунитет е повредено правото на пратенички имунитет, начелото на презумпција на невиност, поради непочитување на ниту една од горенаведените одредби од страна на полицијата. Пратениците со лисици на рацете се приведени во судот, каде што по подолг престој се пуштени, а мерката притвор им е изречена по неколку дена откако во Собранието на Република Македонија се одлучи за одземање на пратеничкиот имунитет“, вели Мемети.
Тој истакна дека доставил Препорака до министерот за внатрешни работи, Оливер Спасовски, да спроведе целосна постапка за испитување на начинот на постапувањето на полициските службеници, да утврди одговорност и да се санкционираат прекршителите на правата на пратениците.
Истовремено Мемети почитувајќи ја независноста и самостојноста на судската власт сепак смета дека е потребно да го постави прашањето: „Зошто судот издал наредба за приведување и претрес на лица кои уживаат имунитет без претходно истиот да им биде одземен, согласно утврденото во прописите?“
Во тој контекст Мемети апелира до Судот „при носење на судски одлуки да се почитува правото на имунитет, од причина што не е прв пат со судски наредби Судот да го повредува правото на имунитет“.
М. Ивановска
