Еврокомесарот за проширување и соседска политика, Јоханес Хан, вчерашната средба помеѓу македонскиот премиер Зоран Заев и неговиот грчки колега Алексис Ципрас на „Твитер“ ја оцени како многу добра вест.
„Средбата помеѓу Алексис Ципрас и Зоран Заев е многу добра вест. Покажува храброст, визија и државништво. Решавање на долгогодишниот спор ќе биде добро за двете земји, регионот и Европа“, напиша Хан.
Заев и Ципрас вчера на маргините на Светскиот економски форум во Давос порачаа дека крајното решение за спорот со името мора да биде прифатено од двете страни и дека силно се посветени на мерките на градење доверба.
Заев потенцираше дека Македонија нема територијални претензии кон Грција и за да го докаже тоа ќе ги смени имињата на аеродромот „Александар Велики“ и автопатот „Александар Македонски“ кој ќе се вика „Пријателство“.
извор: МЕТА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.
