Поддршка во процесот за решавање на спорот со Грција попладнево даде и претседателот на Република Турција Реџеп Таип Ердоган на средбата со премиерот Зоран Заев, кој со владина и парламентарна делегација е во официјална посета на Турција. Претседателот на Турција оценил дека тоа е добро за Балканот и за евроатлантските перспективи на Република Македонија.
Владината прес-служба соопшти дека на средбата со Ердоган, на која премиерот Заев бил придружуван од министерот без ресор Аднан Ќахил, било констатирано дека двете пријателски земји имаат потенцијал за унапредување на економската соработка преку зголемување на турските инвестиции како и преку нови иницијативи од страна на Македонија.
Претседателот на Турција, Ердоган, ја поддржал иницијативата од премиерот Заев за зголемување на квотите за извоз на телешко и јагнешко месо во Турција, а најавил и дека овој став ќе го пренесе на Владата на Република Турција. Тој изразил поддршка и охрабрување на турските бизнисмени за инвестирање во Македонија.
Заев потенцирал дека за граѓаните на Република Македонија е многу важна секоја активност и инвестиција којашто влијае на покачување на животниот стандард и отвора нови работни места во Македонија и во таа насока му се заблагодарил на претседателот Ердоган за развојот на економските односи, како и за поддршката од Република Турција за членство на Република Македонија во НАТО и ЕУ.
[divide]
извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини
