– Денеска е Светски ден на здравјето. Во 1948 година стапил во сила Уставот на Светската здравствена организација.
1348.- Во Прага бил основан Универзитет, прв во централниот дел на Европа.
1614.- Умрел шпанскиот сликар и вајар од грчко потекло Ел Греко. Од родниот Крит преку Венеција, каде што учел да слика кај Јакоп Тинторето, и Рим пристигнал во шпанскиот град Толедо во кој живеел 37 години и останал до смртта. Тој најмногу сликал портрети и обработувал религиозни теми. Негови најпознати дела се „Погребот на грофот Оргаза“, „Духови“, „Лаокон“, „Толедо“ и други.
1770.- Роден е англискиот писател Вилијам Вордсворт, чија поезија го означи преминот од класицизмот во романтизмот. Централна тема на неговата лирика е описот на чувствувањето на мистичната поврзаност со природата. Негови познати дела се збирката песни „Лирски балади“ и стихуваната автобиографија „Прелудиум“.
1772.- Роден е францускиот економист Шарл Фурие, социјалист-утопист кој сметал дека капитализмот е „асоцијален“ бидејќи во него поединците се во постојана војна едни со други. Дела: „Новиот индустриски и општествен свет“, „Теорија на четири проекти“, „Собрани дела“.
1915.- Родена е американската пејачка Елинора Фејгн, позната како Били Холидеј, наречена „кралица на џезот и блузот“. Според музичките критичари, се уште ниту еден џез-пејач не се доближил до нејзините интерпретации.
1939.- Фашистичка Италија започнала инвазија врз Албанија. Земјата била заземена без ниеден испукан куршум.
1939.- Роден е американскиот филмски режисер, сценарист и продуцент Френсис Форд Копола, еден од најзначајните филмски творци во САД во втората половина на 20 век, добитник на пет Оскари и две „Златни палми“ на фестивалот во Кан. Ги режирал филмовите „Деменција“, „Сега си голем дечко“, „Долината на среќата“, „Кум“, „Кум II“, „Кум III“, „Големиот Гетсби“ и други, а сценарио напишал за „Њујоршки приказни“, „Кум“, „Деменција“ и други филмови.
1945.- Американските авиони во Втората светска војна го потопиле најголемиот јапонски воен брод „Јамато“.
1947.- Умрел американскиот автомобилски магнат Хенри Форд, кој најмногу придонесол за развојот на автомобилизмот. Првите „бензински кочии“ ги конструирал во 1896 година, а од 1899 година произведувал автомобили. Прв го вовел сериското производство, а во 1908 година го создал „моделот Т“, првиот „народен автомобил“.
1953.- Во Белград умрел Димитар Влахов, македонски револуционер, политичар и публицист. Повеќе децении бил присутен на македонската историска сцена во борбата на македонскиот народ за национално и социјално ослободување. Роден бил во Кукуш, Егејска Македонија, на 8 ноември 1878 година.
1963.- Донесен бил уставот со кој називот Федеративна Народна Република Југославија бил сменет во Социјалистичка Федеративна Република Југославија, а Јосип Броз бил прогласен за доживотен шеф на државата.
1966.- Од Средоземното Море кај шпанскиот брег била извадена американска хидрогенска бомба, која паднала од авион поради техничка грешка.
1980.- САД ги прекинале дипломатските односи со Иран.
1990.- Фериботот „Скандинавска ѕвезда“ бил зафатен со оган во текот на крстарење во Северното Море меѓу Норвешка и Данска и во несреќата загинале 158 луѓе.
1992.- САД ги признале како независни држави поранешните југословенски републики Словенија, Хрватска и Босна и Херцеговина.
1994.- Во текот на судирите меѓу припадници на војската, полицијата и бандите во главниот град на Руанда, Кигали, бил убиен премиерот Агата Увилингијиман.
2005.- По речиси шест децении, откако во 1947 година била повлечена границата меѓу Индија и Пакистан во Кашмир, отворена била автобуска линија меѓу престолнините на индискиот и пакистанскиот дел на Кашмир, Шринагар и Музафарабад.
2006.- Во северен Багдад, во три експлозии на бомбаши-самоубијци внатре и пред шиитска џамија загинале 70 луѓе, а биле ранети 158 лица.
2017.- Во Загреб на 87 години починал големиот хрватски и југословенски актер Реља Башиќ. Кариерата ја започнал во драмскиот ансамбл на ХНК во 1955, но во 1968 станува самостоен уметник и игра на повеќе театарски сцени. Реља Башиќ е еден од плејадата успешни и популарни југословенски глумци, а на повозрасната публика и е познат по бројни филмски улоги. Најпозната е неговата ролја во филмот „Кој пее, зло не мисли“, како господин Фулир. Во својата кариера Реља Башиќ играл во 3.700 театарски претстави, а глумел во над 56 домашни и странски филмови. Башиќ е роден во 1930 година во Загреб.
Извор: МИА
