Шпекулациите за менувањето на владиниот состав и реконструкција на Владата денеска се центарот на вниманието на јавноста. Дел од медиумите, повикувајќи се на партиски извори, вчера објавија дека ДПА и БЕСА на Гаши ќе добијат по едно министерско место и оти ова е договорено на средба со премиерот Зоран Заев.
Според пишувањата во медиумите, ДПА ќе го добие Министерството без ресор со кое раководеше Рамиз Мерко, а БЕСА ќе раководи со Министерството за култура. И двете партии ќе добијат и заменици-министри, државни секретари и директори.
Во тој контекст, претседателот на ДПА, Мендух Тачи, денеска изјави дека имаат конкретна понуда од премиерот, неговата партија да стане дел од Владата.
„Мислам дека нема да му биде тешко на Централното собрание да одлучи, поаѓајќи од конструктивното однесување на ДПА за време на политичката криза и конструктивниот пристап на новата Влада за реформи и особено за интеграциските процеси за кои имаме точни информации дека ќе имаат позитивен напредок и затоа се надевам дека Централното собрание ќе донесе позитивна одлука“, рече Тачи.
Кривична пријава против четири лица меѓу кои и поранешниот градоначалник на општина Јегуновце денеска поднесе Секторот за внатрешни работи Тетово.
Кривични пријави за „злоупотреба на службена положба и овластување“, „несовесно работење во службата“, „соизвршителство“ заработија Т.К. (50) од Скопје, Д.С.(42) од село Јанчиште, Р.М. (46) од село Беловиште и Д.К. (41) од село Туденце. Тие со извршените кривични дела го оштетиле буџетот на општина Јегуновце во вкупен износ од 5.661.354 денари.
Претстојниот самит на Европската унија за Западен Балкан кој ќе се одржи задутре во Софија е во фокусот на вниманието, особено поради средбата на премиерот Зоран Заев со грчкиот премиер Алексис Ципрас, каде се очекува да се додефинираат ставовите на двете земји околу решавање на проблемот со името.
ЦИВИЛите денеска се на отворено со информативни штандови на кои граѓанките и граѓаните можат да се запознаат и да се вклучат во активностите на организацијата. Повелете пред нашето седиште, на Максим Горки 31/1, на паркингот зад преминот кај „Палета“.
Маја Ивановска
