Во Република Македонија досега малку се обрнуваше внимание на култоролошките активности на лицата со посебни потреби, а уште помалку на фактот тие директно да се вклучени во создавањето на уметност. Во рамките на проектот „Уметност за сите“ кој е поддржан од Холандската амбасада во Републка Македонија, Националната галерија на Македонија ја организира трибината со наслов „Културолошка инклузија на лицата со посебни потреби во Република Македонија“, на 22 мај (вторник) во 18 часот во објектот Чифте амам.
Процесот мора системски да се решава со заедничка соработка на Министерството за труд и социјална политика, Министерството за образование, невладиниот сектор, училиштата, родителите што ќе овозможи квалитетен живот од најрана возраст. Националната галерија на Македонија последниве години дава значителен придонес во подигнување на јавната свест за најранливите категории деца преку организирање на голем број ликовни работилници.
Како македонското општество пристапува кон инволвирање во културните збиднувања на оваа категорија граѓани, на трибината ќе одговорат – Мила Царовска, министер за труд и социјална политика, проф. д-р Владимир Трајковски, Филозофски факултет, проф. д-р Синоличка Трпкова, Факултет за Драмски уметности, Денис Јанкуловски, Невладина организација Аутизам МК и Доменика Кардула, родител.
Д. Муратов
