Алтернативно Скопје, концерт на алтернативна музика, ќе се одржи по четврти пат, на 30 јуни, на платото пред МКЦ, во организација на Млади за Скопје.
Концертот ќе биде на отворено, и ќе настапат 6 бендови од Македонија, меѓу кои: Angza, Man In a Suit, Conspiracy, ИлузијА, Mofrej и Tonal.
Алтернативно Скопје е DIY фестивал кој што за прв пат се организираше во 2014 година, во летното Кастро во соработка со Пеце Суперхикс. Фестивалот го организираат Димитар Тодороски и Андреј Арсеновски (МЛАДИ ЗА СКОПЈЕ). Во 2015 и во 2016, и оваа 2018 година фестивалот се одржува во Младинскиот Културен Центар во соработка со Владица Младеновски – Грга и директорот на МКЦ – Русе Арсов.
„Неверојатна беше приликата да се организира концепт од ваков тип, бидејќи сите фестивали сме ги правеле со огромни ризици и без буџет. Без никаква медиумска и било каква поткрепа и поддршка освен на музичкото радио Канал 103. Оваа година на наше големо задоволство и Телевизија Телма покрена интерес за медиумски да го покрие Алтернативно Скопје #4.“ вели Димитар Тодороски, еден од организаторите на концертот.
Организаторите на настанот велат дека целта и поентата на Алтернативно Скопје може да се види и по самиот негов карактер, и самиот концерт го споредува со летна варијанта на фестивалот „Земјотрес“.
„Алтернативно Скопје има политика за промоција на исклучително млади македонски авторски бендови. Оддекот на фестивалот е неверојатен, со во просек над 200 гости секоја година, со тоа што најголемиот дел од публиката се тинејџери што прв пат се сретнуваат со рок н рол.“ вели Димитар.
Според Димитар, македонската држава има огромен проблем со нејзините културни вредности кои главно се сервирани од државите од кои таа некогаш била под окупација, било да се сериите или турбо-фолкот.
„Се надеваме дека преку давање примарно значење на нашата автохтона музика и автохтона култура ќе постигнеме македонската култура да не биде зависна од никого туку сама се повеќе да се гради, преку нејзе и луѓето духовно да прогресираат, а со тоа да се постигне општествен прогрес.“ додава Димитар.
Влезот за настанот е слободен, а поддршка за бендовите ќе можете да дадете преку донации.
А. Петровска