За Едмонд Адеми, министер без ресор задолжен за дијаспора, „палењето на сликата на премиерот Зоран Заев во Австралија од страна на неколку поединци од македонската дијаспора, за мене е чин на примитивизам“.
„Чин кој е последица на националистичката и изолациска политика на претходната власт, базирана на поделби, омраза и страв, која за жал беше поддржана од дел од дијаспората. Таа политика последните 11 години ги загрози државните интереси и ја доведе земјата до раб на распад.“ – вели Адеми.
„Оваа влада за кратко време ја врати Република Македонија во центарот на градење регионална соработка и ги унапреди меѓународните односи. Македонската дијаспора е исклучително важна во овој процес, и наместо да биде алатка за партиски цели, очекувам да биде мост на поврзување помеѓу Македонија и светот. Тоа се луѓето кои најдобро знаат дека западно европските вредности се истовремено и македонски вредности, и затоа најдобро можат тоа да го покажат на домашната и меѓународната јавност.“ – истакнува Адеми и притоа им заблагодари на прогресивните исленици од Македонија низ светот, за кои вели дека се „вистински борци за македонските интереси – Македонија да биде развиена демократска држава, поврзана со светот“.
М.Л.
