Мисијата на ОБСЕ во Скопје, имплементира кампања за подигање на свеста на тема „Поттикнување на граѓанското учество преку серија регионални дебати и форуми“. Целта на оваа кампања е иницирање на граѓанска вклученост и учество во сите животни текови кои имаат цел подобрување на квалитетот на животот на локално ниво.
На денешната прес-конференција Мисијата на ОБСЕ во Скопје, ја промовираше кампањата чија цел е поттикнување на граѓаните, јакнење на капацитетите на граѓанскиот сектор, бизнис заедницата и локалните власти да иницираат проактивност и креираат соработка со цел подобрување на севкупните услови за живот во земјава.
„Учеството на граѓаните во политичките и социјалните сфери на општествено делување е еден од клучните елементи на функционалната демократија и демократското владеење. Нивото на граѓанско учество и ангажирање во активностите кои се политички и општествено важни е на многу ниско ниво“ се вели во соопштението на Мисијата на ОМСЕ, водејќи се според анкетите спроведени од ИРИ во 2015 година.
Анкетите какожуваат дека 51% од граѓаните воопшто не се мотивирани (покрај 17%, кои не се доволно мотивирани) да учествуваат во било која форма на политички и општествени активности за решавање на конкретен проблем или за влијание врз одлуките на политичарите.
Според резултатите од анкетите, граѓаните во земјава дека не веруваат дека нешто може да се промени, или пак се рамнодушни кон политичкото учество.
„Овие наоди покажуваат дека свеста на граѓаните, како и нивната мотивација, е многу ниска кога станува збор за било каков социјален и / или политички ангажман. Бидејќи ова е прашање на перцепција, мотивација и верувања, наместо институционален проблем, кампањата за подигање на јавната свест на национално ниво може значително да го подобри овој аспект како важен принцип на добро владеење“стои во соопштението.
Во рамките на кампањата под слоганот #АкоЈасСеПрашувам се организираат шест локални дебати и еден регионален форум за граѓанско учество.
Локални дебати се организраат во Велес, Штип, Струмица, Тетово, Охрид и Куманово и регионален форум во Битола. Покрај дебатите и форумот за потребите на кампањата развиен и подготвен е и сет на промотивни материјали, ТВ реклами, флаери, постери, објави на социјалните медиуми, маици, и награден конкурс за иновативни идеи на тема Граѓанска вклученост. На трите најкреативни идеи ќе им бидат доделени таблети како награда. Кампањата се реализира во периодот од 11 до 22 декември.
Б.Ј.
