Албанците покажаа дека знаат како да гласаат во декември 2016-та. Нивните гласови го скршија режимот на Груевски и ја казнија ДУИ со преполовување на мандатите. Албанската опозиција доби здружено исто мандати колку и ДУИ. Математички прецизно, доволно да падне Груевски,а и да се добијат други гласови во сите важни процеси што следуваа.
Албанците повторно покажаа дека се свесни гласачи и на првиот круг на изборите за претседател. Неспорна е нивната поддршка за Стево Пендаровски, но и критиката кон политиките на власта изразена преку апстиненција, како и легитимирањето на опозицијата која доби ветер во грб а и гласачи надвор од партиските симпатизери преку квалитетот што во кампањата го донесе проф. Река.
На Албанците им е јасно дека во вториот круг на претседателските избори на 5 мај, избираат меѓу нивните акламативни стремежи кон Западот, кон НАТО и ЕУ, или – останување во изолација. Освен тоа, јасно им е дека избираат дали ќе имаат претседател на сите граѓани, човек кој ќе ги цени и почитува, или некој што ќе ги продолжи негативните политики и однесување кон Албанците.
Албанците паметат долго, и знаат да гласаат. Не знам дали и е јасно тоа на кандидатката Силјановска, која со години конзистентно поддржува политички опции и решенија што се против реализација на еднаквоста на Албанците во земјата, а е сега поддржана од партијата и братијата која – од нејзиното основање во 90та, преку „сатарите“, „Гасните комори“ на Филип, Влатче и Антонио, па се до 27ми април што го потпалуваше со „Тиранската платформа“ а сакаше да го зачини со убиство на Зиадин Села за да поттикне меѓуетнички конфликт – се базира на антиалбанството како еден од столбовите на нејзиното дејствување.
Така да знаете. Пораките за пратениците и градоначалниците Албанците ќе ги испорачаат на соодветните избори. А за претседателските – ќе гласаат Албанците паметно и во вториот круг. Математички прецизно, што би рекол лидерот на Силјановска, Мицкоски. Белким не не мисли току будали, да гласаме против себе…
