„Утринскиот политички сегмент во најраните часови на националната телевизија умее перфидно да ја искористи вашата недоволна расонетост да ви влезе под кожа место кафе или чај во желудникот и да постигне „задоволителни поени“ кај шефовите.
Оние, надвор од зградата наречена Стојанка. Во анкета, емитувана околу седум часот наутро на 28 февруари, како и поголем број од она што како таков жанр едноставно не е најавена соодветно, не се слуша прашањето од новинарот, што е елементарно правило, а од одговорите на прашаните треба да заклучиме дека не била само дилемата – каков претседател треба да имаме, туку имало и сугестија – од кој пол треба да биде!“, пишува специјално за ЦИВИЛ МЕДИА, новинарот и аналитичар Љумомир Костовски во колумната „БАЛАНСИРАНО ИЗВЕСТУВАЊЕ: Како „неутралните“ телевизии ги селектираат вестите?“.
Како што анализира Костовски, за анкетите кај нас веќе веќе сè е познато и претставуваат перфидни форми на силување на сликата за стварноста на нашите ТВ екрани и додава личен пример.
-Сум искусил една таква утринска анкета на МТВ за цените, на артиклите некаде во септември, каде што бевме влезени само тројца, а само јас бев со кесите во рака, додека другите (две анкетирани жени) според местото каде што беа сопрени, а поминуваа на пристојно растојание од маркетот и барем едната од нив е политички силно ангажирана, можете да претпоставите во која партија. Мојот одговор беше скратен, исечена суштината, а задржано парче од реченица што на анкетарката ѝ одговарало.
Но за анкетите веќе сè е познато. Тие се перфидни форми на силување на сликата за стварноста на нашите ТВ екрани. Во случајот, тоа е прогласување на отворена и пристрасна битка за претседателската вила на Водно, онака без фанфари, „за Власите да не се досетат.“
Впрочем, ние имаме една нескротена, постојана, жестока кампања која е емитувана од Палатата Татарчев постојано и без усул. Шефот на ВМРО-ДПМНЕ, Мицковски, треба во сите вести, од утрото да биде прв со комплетно аудиовизуелно претставување. Како за добро утро. Може и вчерашна вест. По било кој повод. Потоа можат да следат другите од јавните личности, по можност само со фотографија, но никако да не се претставуваат оние кои се рамни на него по функцијата или, не дај боже, да се потенцијален конкурент на нивната кандидатка за претседател на државата, Гордана Силјановска.
БАЛАНСИРАНО ИЗВЕСТУВАЊЕ: Како „неутралните“ телевизии ги селектираат вестите?
Специјално за медиумската платформа на ЦИВИЛ. Текстот е личен став на Авторот.