Апелациониот суд официјално потврди за „Порталб.мк“ дека ја смениле првостепената одлука за случајот „Алмир Алиу“, со која на Бобан Илиќ, кој со автомобил усмрти 4-годишно дете од Куманово. Казната е намалена од 6 години на 4 години затвор, додека остатокот од одлуката останува ист, односно таткото на Алмир е осуден на 6 месеци, додека другите двајца членови на семејството со по 9 месеци затвор.
Од Апелација велат дека одлуката за овој предмет ќе биде објавена во наредните денови.
Со оваа одлука роднините на починатото дете, немаат право на жалба во Врховен Суд против пресудата на Апелациониот суд, бидејќи затворската казна им е помала од 1 година. За разлика од нив, Илиќ ако сака може да се жали во Врховен суд.
„Ако некое лице е осудено на безусловна казна затвор или малолетнички затвор од најмалку една година, неговиот бранител може да поднесе барање за вонредно преиспитување на правосилната пресуда поради повреда на закон во случаите предвидени со овој закон“, стои во член 463, став 1.
Во овој случај, членовите на семејството на Алмир имаат право да бараат правда пред Меѓународниот суд за човекови права во Стразбур.
Малиот Алмир Алиу беше прегазен од Бобан Илиќ на 25 јуни 2016, по банална расправија на семејствата Илиќ и Алиу пред Здравствениот дом во Куманово. Алмир почина на 2 јули 2016 година.
Првообвинетиот Бобан Илиќ, прво беше обвинет за убиство, а потоа делото беше преквалификувано во тешки дела против безбедноста на луѓето и имотот во сообраќајот. Судскиот процес беше со постојани тензии, а беа организирани и протести пред судот во Куманово и во Скопје. Последниот голем протест беше одржан пред Владата, каде граѓаните бараа од властите да обезбедат фер судење.
Возилото со кое е усмртен Алмир му е вратено на семејството на убиецот и истото е огласено за продажба.
Возилото е поправено и огласено за продажба, иако во записникот од Основното обвинителство во Куманово е наведено дека „Со потврда за привремено одземени предмети број 267/4389 од првопријавениот е одземено ПМВ марка Мерцедес, со регистарски број KU-0914-AD, со напомена дека истото му е оставено на чување во неговиот двор без притоа да смее да се врши било какви поправки на истото која потврда е прилог на пријавата“.
Основниот Суд во Куманово во јуни 2019 година повторно го осуди на 6 години затвор, Бобан Илиќ од Куманово, за сторено кривично дело тешки дела против безбедноста на луѓето и имотот во сообраќајот. Таткото на Алмир, Седат Алиу на 6 месеци, додека Сами Демири и Абдулах Алиу на по 9 месеци затвор. Истата одлука беше потврдена на второто судење. Предметот повторно отиде во Апелација, при што сега овој Суд се предомисли и за разлика од првиот пат, и на Илиќ му ја намали казната од 6 на 4 години.
Д. Тахири
