Не само што треба да најдат начин за снабдување, туку БЕГ има и обврска за тоа согласно Законот за енергетика. Носителите на лиценците не може да престанат да ја исполнуваат обврската за испорачување на јавна услуга, ова вечерва го соопшти министерот за економија Крешник Бектеши во емисијата „Топ тема“ на Телма, во која дебатираше со градоначалничката на Скопје, Данела Арсовска и професорот Горан Рафајловски.
Бектеши посочи дека доколку БЕГ го прекине снабдувањето со топлинска енергија без претходно информирање на Регулаторната комисија за енергетика дека имаат проблем, РКЕ има право и да им ја одземе лиценцата, и дека согласно законот, тие се обврзани и да имаат количини за снабдување со топлинска енергија со алтернативно гориво во период од 15 дена.
Тој посочи дека проблемот со снабдувањето со топлинска енергија во Скопје-Север, треба да биде решен преку Општината Чаир или други институции со интервенција од 20 милиони денари. Министерот Бектеши нагласи дека Скопје и општините имаат и законска обврска да помогнат на граѓаните за поскапувањето на парното, и дека Владата ги повикала Градот Скопје и општините во градот да се вклучат со креирање мерки за да излезат во пресрет на граѓаните, а дека централната власт ќе им помогне на Град Скопје и општините за префрлање на средства до локалните самоуправи за обезбедување природен гас за греење на јавните институции.
Бектеши праша зошто градоначалничката на Град Скопје Арсовска и Советот на Град Скопје не предвидоа ни денар во буџетот во енергетската криза за 2022 година.
„Владата и Министерството за економија го повикаа Град Скопје во нивниот буџет за 2022 година да одделат средства за ублажување на притисокот од енергетската криза врз граѓаните. Тоа е покажување грижа за граѓаните и тоа требало да го има предвид Град Скопје“, рече Бектеши во дебатата, и додаде дека Град Скопје може да побара пренамена на наменските средства кои владата ѝ ги има исплатено на локалната самоуправа со цел справување со енергетската криза.
Според градоначалничката Арсовска, Градот како и останатите општини немаат никакви ингеренции, а се обременети со оваа ситуација. Таа рече дека Град Скопје ќе предложи мерки за справување со ситуацијата.
„Давање предлог мерки е она што можеме да го направиме со оглед на практиките кои што ги има не само во регионот, туку и низ цела Европа, едноставно можеме да понудиме мерки со кои што ќе се ублажи ценовниот шок за граѓаните, затоа што за жал, како што знаете, општините во Скопје се наоѓаат во една незавидна положба, презадолжени се, а тоа се долгови што се влечат од пред извесен период“, истакна Арсовска.
Таа вели дека ваквата моментална состојба не овозможува да се интервернира или да се преземе драстичен чекор.
„Ние практично имаме свои трошоци кои што како град мораме да ги покриеме, а сите тие се во интерес на граѓаните, меѓутоа се премногу сложени за да можеме да интервенираме за вакви мерки, а притоа степенот на децентрализација на општините и средствата кои што тие ги добиваат за да можат да работат се навистина ограничени“, потенцираше Арсовска во дебатата.
Ц.Д