Обезбедување фискална поддршка во годинашниот Буџет за надминување на ефектите од кризата, внимателно следење на ценовните движења и зачувување на ценовната стабилност на среден рок преку водење соодветна монетарна политика, продолжување со реформите во управувањето со јавните финансии преку постепена фискална консолидација на среден рок, усвојување на новиот закон за буџет, спроведување на Даночната стратегија и дигитална трансформација на Управата за јавни приходи, донесување нов закон за јавно приватно партнерство, како и подобрување на деловното окружување преку продолжување со дигитализацијата на јавните услуги, рационализација на парафискалните давачки и усвојување нова стратегија за формализација на економијата, се само некои од препораките што произлегоа од Економско-финансискиот дијалог на земјава со ЕУ, што се одржа на 24 мај годинава во Брисел, пренесува МИА.
Како што соопшти министерот за финансии Фатмир Бесими на денешната заедничка прес-конференција со евроамбасадорот Дејвид Гир, во дискусијата со Европската комисија, по доставување на Програмата на економски реформи 2022 – 2024, договорено е фокусот во наредниот период да биде насочен и кон усвојување на правната рамка за енергетска ефикасност и воспоставување фонд за енергетска ефикасност согласно Зелената агенда за Западен Балкан на ЕУ, како и кон продолжување со реформите во образованието, особено кон средното стручно образование.
Меѓу заедничките препораки е и зголемување на опфатот и пристапот на невработени ранливи категории со мерките од Оперативниот план за активни политики и мерки за вработување и преку зголемена соработка на центрите за вработување и социјалните центри.
-Целта на спроведувањето на овие заклучоци е да се зајакнат економскиот и социјалниот развој на земјата, како и да се приближиме кон постигнување на барањата од Копенхашките критериуми за пристап кон ЕУ, истакна Бесими.
Според него, со официјалното усвојување на заедничките заклучоци почнуваат подготовките за наредната Програма на економски реформи 2023-2025 година.
-Ова е време на големи економски предизвици, за што се бара внимателно креирање на фискалната политика, со мерки за поддршка на економијата и граѓаните, но и мерки за поттикнување на растот, подвлече министерот.
Бесими оцени дека воспоставената пракса на дијалог на високо ниво во изминатите две години помеѓу министрите и директорите на директорати во Европската комисија за предизвиците со кои се соочува земјата за постигнување одржлив економски раст, е силен сигнал до ЕК за нашата посветеност за процесот на преговори, каде што Програмата на економски реформи има клучна улога и претставува оперативна алатка за спроведување на структурните реформи кои се предуслов за користење на финансиските средства од Економско-инвестицискиот план на ЕУ за Западен Балкан.
Ребалансот е одговор на кризата која не можеше да се предвиди во перидот кога се подготвуваше Буџетот за 2022 и во него, освен кратења, има и додавања, но и реприоретизирање на средствата, рече денеска министерот за финансии Фатмир Бесими.
Одговорајќи на новинарски прашања по заедничката прес-конференција со евроамбасадорот Дејвид Гир, Бесими нагласи дека очекува Собранието во наредните денови да закаже пленарна седница за ребалансот.
-Со ребалансот се дава одговор на кризата. Мерките што се најавени, се гледаат. Зошто одиме со овој ребаланс и што сакаме да постигнеме – требаше да се адресираат сите потребни прашања меѓу кои и дополнителни средства за кризата за мерки за ранливите категории, кои ќе бидат привремени зависно од потребите, но и да се одржат политиките што ќе значат зачувување на растот. Бидејќи трошоците значително се зголемија и дефицитот се зголемува за 150 милиони евра. При тоа со ребалансот има и околу 13,4 милијарди денари кратења, но во исто време има и додавања, истакна Бесими.
Тој потенцира дека тоа што е ставено во Предлог – ребалансот на буџетот, се очекува и да се реализира.
Според него, како што е договорено на Влада, се крати во сите институции по 10 отсто за трошоци што се неприоритетни, односно кај расходите за стоки и услуги, како што се расходи за ситен инвентар, мебел, возила, а се врши и реприоретизација во однос на динамиката на реализација на некои проекти. Зголемувања, потенцира, има во социјалата и земјоделството, а предвидени се и 76 милиони евра за антикризни мерки.
Патните трошоци, објасни Бесими, не се однесуваат на инстутициите, туку се кај Службата за општи заеднички работи наменети за бегалци и раселени лица од кризата во Украина и Авганистан.
Министерот информира дека во наредните недели ќе има конечен документ во однос на финансирањето. -Планирано е делумно финансирање од ММФ, делумно финансирање за проектите од меѓународните финансиски институции, како и делумно од ЕУ преку ИПА програмите или Рамката за Западен Балкан. Делумно ќе се финансира со задолжување во земјата и на странските пазари. Имаме околу 200 милиони евра отплата на претходен долг, рече Бесими.