Заврши 133-та седница на Комитетот на министри на Советот на Европа, односно редовниот состанок на министрите за надворешни работи на земјите-членки на СЕ, кој, според процедурата, се одржува еднаш годишно. Шефовите на дипломатиите имаа дводневни средби. И покрај очекувањата и напорите, Косово не беше на нивната агенда, пишува Коссев.
На оваа пролетна редовна седница учествуваа вкупно 46 министри.
Заседанието беше и последниот чекор за Косово да стане членка на оваа меѓународна организација, откако претходно извештајот за нивниот прием беше одобрен во Комисијата за политика и финансии, како и во Парламентарното собрание на Советот на Европа.
Министерот за надворешни работи на Албанија, Игли Хасани кој присуствуваше на состанокот на Комитетот на министри на Советот на Европа во Стразбур, истакна дека поради неодлуката за членство на Косово е изгубена историска шанса за Приштина, објави Косово онлајн.
„Недонесувањето одлука за членство на Косово на денешниот министерски состанок на Советот на Европа е изгубена историска можност Косово да има заслужено место на масата и посилен глас во формирањето на обединета и демократска Европа“, напиша Хасани на социјалната мрежа Х.
Тој додаде дека е императив Владата на Косово да дејствува брзо за да ги исполни обврските што ги презеде и да се ангажира конструктивно со своите посветени меѓународни партнери и поддржувачи.
„Ова треба да биде проследено со заеднички напори да се одржи уште еден Комитет на министри на Советот на Европа во блиска иднина. Сите мора да дејствуваме брзо за да го исполниме она што му го должиме на народот на Косово“, заклучи Хасани.
Министерот за надворешни работи на Унгарија, Петер Сијарто за Танјуг изјави дека ставот на таа земја во однос на членството на Приштина во Советот на Европа е јасен – не го поддржува, за што е информирана и Приштина. Тој додаде дека Унгарија има принципиелен став по ова прашање, односно дека сака да види успешно финализирање на дијалогот меѓу Белград и Приштина.
Министрите на вчерашната седница, меѓу другото, како што се наведува во извештајот од оваа средба, уште еднаш испратиле порака за поддршка на Украина на „патот кон правдата и обновата“.
Освен тоа, тие усвоија Рамковна конвенција за вештачка интелигенција – првиот меѓународен инструмент на оваа тема, а исто така донесоа и декларација по повод 75-годишнината од постоењето на Советот на Европа.
Министрите повторно ќе се сретнат на 13 ноември, според извештајот, по оваа пролетна седница, но тогаш ќе го предадат претседателството, односно Литванија ќе му го предаде на Луксембург.
Следната редовна 134-та седница ќе се одржи за една година, односно на 13 и 14 мај 2025 година во Луксембург.
Г. Т.
