На веб страницата Рацин.мк осамна насловот „Циганка не може да биде лице на Русија“ во кој се користи навредлив назив за Ромите, што претставува говор на омраза.
Ова е оценка на Мониторинг тимот на ЦИВИЛ (ЦМТ), според чии стандарди, мора да се води сметка и кога се цитира одредена содржина, особено во креирањето на насловите. Во случајов, се работи за цитат, но не се наведува изворот, ниту се квалификува како говор на омраза. Тоа може да ја доведе до заблуда на публиката, односно да поттикне понатамошно ширење на навредливи називи и говор на омраза по етничка основа.
Така, веројатно од невнимание, од прилог кој е наменет за поддршка на слободата на изразувањето, ова станува прилог со кој се шири навредлива содржина на етничка основа.
Редакцијата/авторот на прилогот имаат обврска да објаснат за што се работи, без оглед на тоа што се работи за цитат на коментар од социјалните мрежи (во 2013 година).
Текстот објавен во Рацин.мк го споменува оригиналниот текст, објавен во 2013 година, во кој се говори за говорот на омразата со кој се соочува победничката на манифестацијата Мис на Русија, Елмира Абдрзакова, инаку етничка Татарка.
Тој текст е употребен како илустрација за работата на новинарката Алсу Курмашева, која властите ја уапсија во рускиот град Казан во јуни оваа година, под обвинение дека не се пријавила како „странски агент“, за што може да добие затворска казна до пет години.
ЦМТ
Мониторинг тимот на ЦИВИЛ (ЦМТ) спроведува мониторинг во повеќе области, а дел од своите наоди ги објавува на медиумската платформа на организацијата.
ЦИВИЛ неодамна го обнови повикот до сите граѓанки и граѓани да ги пријават случаите на дезинформации, говор на омраза и поттикнување на насилство. Со тоа ќе придонесат кон спротивставувањето и справувањето со овие појави.
ЛИНК до формулар за ГРАЃАНСКА ПРИЈАВА
