пишува: Сашо Орданоски
[dropcap]Е[/dropcap]дна школа на мислење во политиката вели дека, ако сакате долго да владеете во една мала земја каква што е Македонија, ви требаат само два вида на информации: кој со кого ги прави парите; и кој со чија жена спие. Значи, следете ги тие комуникации.
Тоа се вика „афера со прислушување“.
Комбинацијата од тие две информации – каде се парите и чии се жените – ви дава моќ за да станете речиси апсолутен владетел. А кога ќе завладеете апсолутно, почнувате да спиете со жената на оној со кого самиот ги правите парите.
Тоа се вика „афера со самопослужување“.
Деновиве низ Скопје кружи една приказна, чиј извор не може точно да се идентификува, во која се раскажува дека на еден од најпознатите бизнисмени толку блиски до Фамилијата, што речиси беше посинет во неа, во рамките на една тековна кривична истрага му биле предочени некои релевантни приватни детали од животот на својата сопруга и нејзините односи со неговиот бизнис партнер, прибавени со нелегално следење на комуникациите по налог на неговиот бизнис партнер. Реакцијата на бизнисменов била толку бурна, што веднаш му се јавил на „самопослужениот“ и, откако во долга рецитација му ги спомнал сите семејни колена три генерации наназад и две нанапред, му се заканил дека лично „информативно“ ќе го спакува, бидејќи му ги знае сите деловно валканици во кои, во повеќето, и самиот учествувал.
А потоа, на ист трошок на таа нервоза, се јавил до семејниот поп за да се распраша која е процедурата за раскумување кумство, со акцент на тоа дека, ако канонот е пречка, парите не се проблем. Во такви деликатни околности, за кои поповите имаат особено истенчен слух, вонканонско спогодбено решение брзо се нашло.
Следувала размена на адвокати кои, додека овдека ние диваниме, сѐ уште напорно работат врз меѓусебниот бизнис-расплет на големата и компликувана деловна империја на нашиве неименувани јунаци.
Што, пак, се случува „по дома“ со сопружниците, не е предмет на нашиот интерес. Но, за очекување е дека предметот на интересот на надлежниот истражен орган – со што тргна целиот расплет на оваа приказна – во догледна иднина ќе стане и предмет на интерес на пошироката јавност.
Сепак, оваа приказна би била само уште едно малограѓанско озборување, можеби и чиста, завидлива урбана легенда, да нема важни поуки од неа.
Прво, не прислушувај илегално.
Второ, ако веќе го правиш тоа, не биди љубоморен, па да ја слушаш и швалерка ти – која, згора на тоа, е сопруга на твојот најголем бизнис партнер – оти така се снимаш и себе си кога зборувате „мрсно“ по телефон.
И, трето, ако веќе го правиш и тоа, кога ќе те фатат, не се чуди што твоите политички противници и за тебе ќе ги искористат сознанијата со кого ги правиш парите и со чии жени спиеш, оти така, знаеш и самиот, долго се владее. А кога ќе претераш во сè без мерка, стрмоглаво се паѓа од власта.
Преземањето на оваа содржина е дозволено само по 11 часот, на денот на објавувањето. Потоа, важат вообичаените правила според лиценцата Creative Commons 1.0.
